Shillong, April 26: Meghalaya-ni songadambatgipa aro gari-gorarang re·na man·kugijagipa biaprangchina sana-bananio nanggipa samrangko sokatangna gita a·dok sorkari ia somoirango drone-rangko jakkalskaengaha.
Drone-rangko jakkalengani bidingo Health department-ni Secetary Pa Ramkumar Singh-ni aganani gita, da·odipet nangchongmotgipa kamrangna ge 150 drone-rangko a·doko jakkalchengenga aro ia drone-rang changsanon kg 5 oni kg 6-rang jrima samrangko ra·bite bangbango bilna gita man·a.
Ia drone-rangko nangana jakkalna gita da·odipetde drone station-ko West Garo Hills a·jani Jengjal songosan donengpiti, jekon mikkangchide West Khasi Hills, Ri-Bhoi aro Khasi Hills a·jarangoba adita ge station-rangko donna gita a·dok sorkari miksongenga.
Indake ong·genchimoba, East Khasi Hills a·jara Bangladesh a·song baksa chapchap ong·ani gimin red zone-o ga·akani a·sel ia a·jao drone-rangko bilatna gita department dingtang dingtang ra·bianirangko chagrongna gita nangskaenga aro mamlani bidingo a·dok sorkari, Ministry of Defence baksa agangrike nianirangkoba dakenga.
Iakoba poraie nina man·gen: Nangchongmotgipa bosturangni damrang tang·dopretenganina AASU, Dibrugarh-o jingjengata
