Shillong, Oct 28: Re·baenggipa November 1 tarikoni a·bachenge class I oni class V-ona a·doko skulrangko kullipiltaianina sajinmani giproroaniko champengna gita nangchongmotgipa niamrangko pilak skulrangnan donataha ine Meghalaya-ni Education Minister Pa Lahkmen Rymbui Bristibar salo u·iatangaha.
“Health department baksa agangrikani ja·man a·doko class I oni class V-ona skulrangko kullipiltaina cholrangko on·na chinga tik ka·aha,” ine Pa Rymbui kobor ra·timgiparangna agan-talataha.
Uni aganangkuani gita, a·doko Covid-19 sabisini mamlarang komianganio pangchake skulrangko kullipiltaina tik ka·angaha, indiba ja·rikatna nanggipa pilak nangchongmotgipa niamrangkon donataha.
Bi·sani ma·gipa-pagiparangni nangnikanikoba chinga dal·e ra·enga ine janapatengon, bi·sarangko skulona re·baatna nangani somoiko chinga nama tiktak donataha aro class ge·prako sak 15 ka·esan bi·sarangkoba class ra·anggen ine minister parakataha.
Indake ong·engon, skul ka·anio mongsong nanggiparango pangchake class-ko ra·piltaiani gimin chanchirime tik ka·china school authority-rangna chinga u·iatmanaha indiba chatro-chatrirangna pilak naljokaniko on·na gita nangskagen ine ua aganangkuaha.
Skulko kullipiltaiatani gimin sing·on, a·songo Covid -19 ni komianganio pangchake bang·a a·dokrangan skulrangko kullipiltaina gita tik ka·angtokaha ine education minister u·iataha.
“Unbaksana, a·dokoni bang·batan sajinmani tikako su·mantokaha ine aganenba, jemangan tikako su·tokkujaengachim uamangkoba sakantini naljokanina tikarangko su·e ra·tokchina gita pilak songdonggiparangkoba ua didiangaha.
Sabisi sokbataignigipana manderangni jajrengsoengani gimin aganengon, Mikkangchini giminde an·ching mamingkoba aganna man·ja, indiba tanggitik a·sel ong·na nangaona chu·gimik tarisamsoani gnang baksa an·ching da·oni gimin chanchina nanggen ineba Pa Rymbui aganangaha.
Minnggipinara, obostarango pangchakesa a·dok sorkari tik ka·anirangko dakenga ine janapatan baksa, tanggitik maiba obostarang ong·aona nanga gita ja·kurangko de·china gita chinga daitoko ra·enggipa school managing committee-rang aro deputy commissioner-rangna bilko on·e donmanaha ineba education minister parakataha.
