Shillong, Dec 14: Cancer sagiparangko nambate sanna gita, a·doko skanggipa Cancer Care-ko donna, Meghalaya sorkari aro Apollo Telehealth Foundation-ni gisepo songgigrikaniko dakenba Butbar salo MoU-o soi ka·grikangaha.
With Meghalaya having one of the highest cancer cases in the country, this initiative will be a game changer which will initiate the early detection rate for Breast cancer, Lung Cancer; Cervical Cancer, Oral Cancer, Esophageal cancer through awareness and mass screening. pic.twitter.com/SLqb9yaBPb
— Conrad Sangma (@SangmaConrad) December 14, 2022
Dolgnini gisepo songgigrikaniko dakanganio a·dokni skotong minister Pa Conrad K Sangma-ni aganatani gita, manderangna namgipa sana-bananiko on·anio bang·a ra·bianirangko a·doko chagrongna gita nangronga ine aganenba, bi·sarangni an·seng-baljokani, ma·giparangni an·seng-baljokani, bi·sarangna chu·onga gita cha·ani-ringanirangko on·ani, iandakgiparangoni a·bachenge mandeni sabisi jekai Cancer sagiparang an·chingni a·doko bang·en donganichi dingtang dingtang neng·nikanirangko chagrongna gita nanga ine aganangaha.
Sana-banani a·bao bang·bea neng·nikanirangko chagrongna gita nangoba a·dok sorkari ua neng·nikanirangko namatna gita bil ama kakket kamrangko ka·atenga aro iana Health Department-ni gitasan kamrangko ka·atenga ong·ja indiba a·doko sana-bananiko skanggipao done a·dok sorkariba kamrangko ka·atenga ine u·iatanga baksana, a·dok sorkari da·alo sana-banani a·baon bang·bea tangka-paisarangkoba botaha ineba Pa Sangma parakataha.
Ia project-ara a·song gimiko skanggipa ong·a aro ian Meghalaya a·doknasan gamchatgipa ong·aijawa indiba a·song gimiko apsandakgipa kamko ja·rikna gipinrangnaba ian dakmesokani ong·gen ine parakatenba, World Economic Forun baksana Appolo Healthcare gita dakgiparangming bakrime kamko ka·anichi Cancer sagiparang namen bang·gipa an·chingni Meghalaya a·dokosan ia gitalgipa kamna re·chakatanio sakki ong·aijawa indiba a·songni gipin bakrangnaba ong·gen ine skotong minister aganangkuaha.
Indake ong·engon, bang·a manderangni janggiko naljokatna gita apale nisanko donenba kamko ka·china gita ia project ba kamo pilak bak man·pagiparangko mol·molangengon, a·dokoni cancer sagiparangko seng·gnange rim·a man·anichi aro uamangko namedake sananichi sakantikon an·sengatna gita man·a ine manderangko didichina aro uamangna ma·siate on·chinaba skotong minister didianiko on·angjolaha.
A·doko skanggipa cancer care project-ko donna miksonganira, chasongni kri man·gipa technology-rangko jakkale pilakni gita cancer sabisiko sananirangko nambatatna gita ong·enga. Ia project-ni gita, Health and Welness centre-rango cancer-ko screening ka·anirang donga baksana sabisiko man·na altuagipa aro rim·a man·gipa manderangko porikka ka·e niangdapaniba donggen. Ia kamna, ASHA-rang aro a·gipi health staff-ni manderangna training program-rangkoba on·anggen. Uandake, Shillong-ni Civil Hospital-o donggipa Pathology Lab-ko jakkale saani rokomko porikka ka·anirangkoba NCD clinic-rango dakanggen aro ia project-ko East Khasi Hills a·jao skotong done chalaianggen.
