Shillong, Sept 10: Meghalaya Assembly-ni Autumn Session-ko Sukrobaro a·bachengatani skanggipa salo, a·song gimikoni aroba a·dokoni iana skang a·gilsakko wate re·anggipa dilgiparangko gisik ra·e uamangko mande ra·angjolaha. A·dokoni wate re·anggipa dilgipa gitchamrang – Mihsalan Suchiang, Obil Kyndait aro Dr PW Khongjee aro sak 27 gipin dilgiparangko Meghalaya Legislative Assembly, mande ra·aniko dakangaha.
A·dokoni dilgipa gitchamrangni wate re·anganichi a·dokna dal·en gimaani ong·aha ine janapatenba, uamang sakantini a·dokna on·gilanirangko memborrangni gisik ra·atpilaniko a·dokni skotong minister Pa Conrad K Sangma, dakdilangaha.
Sianggiparangoni bang·batan Speaker gitchamrang, skotong minister gitchamrang aro dilgiparang jemangan a·doko aro ma·mong sorkarirango ministerrang ong·e chugipa gadangrango dangdike on·angtokaha ine Pa Sangma, Assembly-o parakataha.
A·doktang Meghalaya-oni a·gilsakko wate re·anggipa dilgiparangko gisik ra·atengon, sianggiparangni dongrikgipa nokdangrangna uni kalimpaaniko on·angjolenba, sakgittaman a·dokni niksenggipa dilgiparang ong·achim ine Pa Conrad gisik ra·atpile aganangaha.
Unomiting, warachakgipa dolni dilgipa Dr. Mukul Sangma-ba a·dokni gitcham dilgiparangna kalimani kattarangko aganangpaanio, “a·dokni manderangna dangdike on·anggipa aro namen niksenggipa politician-rangni wate re·anganio gisik-ka·tongonin angni kalimpaaniko on·a ine aganangaha.
Dr. Mukul-ni aganangkuani gita, politics-ni a·bao dangdike on·anggipa iamang gimikan da·o niksenggiprang ong·tokjaha aro iamangni wate re·anganichi a·dokna dal·en gimaani ong·aha.
