Ampati, April 9: Meghalaya a⋅dokni skotong Minister Pa Conrad K Sangma, congress dolni bilake an⋅pachakgipa biap Ampatio tom⋅anio NPP dolo chakatenggipa manderangko seokchinagita jilmako mol⋅molangaha.
Dr. Mukulni mongsonggipa biapon manderangni NPP-na gisik on⋅bataniko ia chang-o niknagita man⋅aha. Tom⋅anio mande sak 6000-na batpilen sokbatokaha.
South West Garo District-oni sakbonga NPP dolo chakatenggipa Betasingo Premish Sangma, Thebatson Arengh Boldamgrena, Premanando Koch Zikzakna, Sanjib T Sangma Dengdakparana aro Linekar Sangma Nogorparana man⋅gope jinmao aganjanapaniko dake manderangni chakrimaniko a⋅dokni skotong minister Pa Conrad Sangma molmollangaha.
Congress dol GHADC-ko bilsi 20-na sason ka⋅oba maming dingtanganiko ra⋅bana man⋅ja indiba NPP dol bilsi 3-on dingtanganina ja⋅ku de⋅aha ineba Pa Sangma aganaha.
