Tura, Oct 8: Re•anggipa antio mikkarang dontonggija waanganichi a•arang ruronggipa aro chi bangipa biaprangona Mongolbar salo, Meghalaya a•dokni Chief Minister Conrad K Sangma re•ange nieaha aro iandake a•sel ong•anirangchi sianggipa manderangni nokdangrangna ex-gratia ba tangka paisani gita dakchakanirangkoba suale on•angjolaha.
A•arang be•dapanichi aro chirang bananichi duko ga•akenggipa manderangkoba ua dingtang dingtang songrangona aro relief camp-rangona re•ange grongeaha.
Re•anggipa antio Bristibar salonin mikkarang dontonggija waangani a•sel Garo Hills gimikon a•a be•anirangko aro chi bananirangko nikna gita man•ahachim aro Garo Hills-ni dambri a•jarango sak 17 manderang, janggitangtangko gimaatna nangahachim.
A•sel ong•anirango sianggipa sak 17 manderangoni saksnide South Garo Hills-o, sakbongade West Garo Hills-o, sak 3-de East Garo Hills-o aro sakgnide North Garo Hills a•jao ong•achim.
Iandake duk mikchiko aro neng•nikanirangko chagrongna nangenggipa manderangna dakchakaniko on•na gita Mongolbar salo Chief Minister Conrad K Sangma an•tangan a•sel ong•gipa dingtang dingtang songrangona re•angaha aro sianggipa mande sakprakni nokdangrangna gong lak 4 ka•e ex-gratia-ko on•angaha.
Skanggipao ua Tura-ni Rongkhon Songgital-ona re•ange, adita salrangna skang Dimapara jolo chi man•pakange siangna nanggipa Bijoy Marak aro uni depante Wian Chigado R Marak-ni nokdangko grongenba, ex-gratia-ko on•angaha.
Uni ja•man a•dokni Chief Minister, West Garo Hills a•jani Karonggre songo a•a be•dapako man•e siangna nanggipa Sarika M Marak-ni nokdangko grongenba uni nokdangna gong lak 4-ni ex-gratia-ko on•angaha.
Uni ja•man, Dalu jolo donggipa Sorokpara songo a•a be•dapako man•e sianggipa bilsi bongani me•a bi•sa Miando P Marak-ni ma•a paakoba Chief Minister grongeaha aro gong lak 4-ni ex-gratia-ko on•angaha.
Sonibar walo, East Garo Hills a•jani Songsak jolo bol be•dapako man•e siangna nanggipa Tengseng R Marak-ni nokdangkoba Chief Minister grongeaha aro uni nokdangnaba gong lak 4-ni ex-gratia-ko on•angaha. Ia mandeara Dalu jolo donggipa Tibapara songoni ong•achim aro Sonibar walo ua Rongjeng-ona re•angengmiting somoio rang•gitik bol pangsa uni gariko be•dapenba ua rasong gribee sina gita nangahachim.
Uni ja•man a•dokni Chief Minister Conrad K Sangma, Dalu jolo donggipa Koinabhui songo a•a rurongdapako man•e sianggipa Santa Marak sagini nokdangkoba grongeaha aro uni nokdangnaba gong lak 4-ni ex-gratia-ko on•angaha.
Dingtang dingtang biaprango a•a be•anirangko aro chi bananirangkoba Chief Minister niangaha aro songni manderang baksaba uamangni neng•nikanirangko ma•sie ra•na gita agangrikangaha.
Ja•mano a•dokni Chief Minister, West Garo Hills a•jani District Administration aro MSDMA-ni official-rang baksa tom•enba, Dalu C&RD Block-ni ning•o a•a ruronganirangchi aro chi bananirangchi baditana kingking noksan ong•atako man•na nangaha aro baditana kingking songni manderangna dakchakanirangko on•na man•aha, uarangni bidingo chanchirimangaha.
Dalu C&RD Block-ni ning•o a•a be•anirangchi aro chi bananirangchi komibeoba 2630 nokdangrang, nangchakeanirangko man•na nangaha aro nokgri jamgri ong•ata man•gipa manderangna District Administration, dam 68 relief camp-rangko kulie on•aha. Komibeoba sak 17,000 manderangna District Administation, cha•ani ringani aro dongchakanirangko on•aha.
Mikkangchi manderangni janggi gimaanirangko champengna aro manderangni gam-jinrangko chel•chakna man•na gita chi banronggipa biaprango aro a•a be•na altugipa biaprango ja•kurangko de•samsochina gita ia tom•anio a•dokni Chief Minister, dingtang dingtang official-rangna ge•etaniko on•angaha.
Dalu block ning•o nosto ka•a man•gipa rama jal•langrangko ta•raken taripilchina gitaba ua ge•etaniko on•angaha.
Na·simang ia video-koba nina man·gen:
Na·simang iakoba poraina man·gen: MDC Election-o susana dorgasto rangko galchina NPP party okama
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
