Guwahati, Feb 22: Assam Accord-ni Clause 6-ko a·doko ra·gate on·na man·jani gimin BJP sorkarini kosako jegalenba, da·al Sombar salo a·songni Prime Minister Pa Narendra Modi-ni a·dokona jagnini gisepo gittamgipa changna wenbataio All Assam Students Union (AASU), district damantion aro sub-divisionni skotongrango gisim ba·rarangko ka·bako gane jingjengataha.
Assam Accord-ni Clause 6-ko a·doko ra·gate on·gijanichi, wachi-karini somoio chi-bana ong·ani aro a·arang be·wakanirangko a·songni nen·nikani ine parakatgijanichi aro Lower Subansiri Hydroelectric Project baksana a·jao dal·dalgipa na·gil kaanirangko champengatna man·gijanichi ma·mongo sorkariko rikenggipa BJP dol, Assam a·dokni manderangna ku·rachakgiminko chu·sokatna man·jaha ine AASU matnangaha.
Wachi-karini somoio Assam-o chi-bana ong·mitingo, prime minister changsamangba Assam-ona wenbae nirokea gri aro ku·bilbat gita giseposan obostarangko nirokataiaha ine aganenba, batanggimin 2016 bilsini Lok Sabha eleksino, niam gri a·songgipinchini katdobae dongnapegipa gimikan ba·ra-kancharangko botome katpilangtokna nanggen ine prime minister an·tangan aganaha, indiba da·o batesa Citizenship Amendment Act (CAA)ko ra·gate a·songgipinchini manderangko rimdapbae Assam-na bal-bojako gatjetdapachi cha·boknasa am·skaenga, ine AASU-ni dilgiparang jaksi otaha.
High Level Committee-ni chanchirime ra·baanirangko gimikkon ra·gate on·anggen ineba ma·mong sorkari ku·rachakaha. Uni report-ko a·dok sorkarina on·angaoni da·o bilsi-sa gapnakpilengaha indiba iako ra·gate on·anganina ma·mongni jako uko da·onaba sokatkuja ine parakan baksa, committee-ni ra·bagipa agan-ku·pattianirangko basak somoio ra·gate on·anggen uko da·al February 22 tarikon prime minister-ni jinmana parakataniko chingna nanga, maina a·songni niam-bidikchi naljokatanirangko a·dokni manderang man·na bilrang donga ine union-ni dilgiparang agandapaha.
Indake ong·engon, songsul a·song Bangladesh, Afghanistan aro Pakistan a·songrangoni Muslim ong·gijagipa bang·pagija jatrangna a·songo songdongkamna cholko on·angna miksonge ma·mong-ni ra·bagipa Citizenship Amendment Act (CAA)ko ra·galpilchina dabian baksa, Assam Accord-ni Clause 6-ko a·doko ra·gate on·chinaba dabiangjole mija January 23 tariko PM Modi-ni a·doko wenbamiting somoioba AASU, uni kosako jegale jingjengatanirangko dakataha.
Uamangni dabienggipa Assam Accord-ni Clause 6-ni gitade, a·doko songdongkamgipa Assamese jatrangni man·rikrikbagipa daka-rikani bewal, songsalo janggi tangani bewal, ku·sik aganani aro pilak dakbewal-rikbewalrangna chu·gimik naljokaniko aro chelchakanirangko on·china ong·a.
