Tura, March 19: “Aatmanirbhar Bharat An Initiative to Foster Entrepreneurship”-o pangchake Tura-o skanggipa changna National Seminar-ko Sukrobar salo Tura Hotel Polo Orchid-o ong·atangaha.
Ia programo West Garo Hills a·jani Deputy Commissioner Pa Ram Singh, mongsonggipa sokgipa ong·e bakko ra·angaha aro unbaksana Tura NEHU campus-ni Vice Chancellor, Prof G Singaiah, Guwahati MSME-DO-ni Jt Director Pa Debabrata Mitra, Commerce and Industries Department-ni gitcham Director Pa D K Arengh, SBI Regional Business Office, Tura-ni AGM, Pa Dharmananda Banai, Tura SBI-ni District Manager, Pa AM Khan, District Commerce and Industries Centre, Tura-ni Pa Lewin Marak aro NER, Progress Harmony Development (PHD)-Chamber-ni Deputy Resident Director Pa SK Hazarika -maang gimikba dongpae Foster Entrepreneurship-o bakrime dingtang dingtang tangka-paisa man·ani cholrangko skie on·angaha.
Programo mongsonggipa sokgipa ong·e Pa Ram Singh, tom·bagipa manderangna aganprakengon, India a·songo bang·a skia-pora man·gipa chadamberang sorkarini kamko man·gija dongenga, uamang sorkari kamna senge dongenba iandakgipa entrepreneurship-o bakko ra·na sikja. Uni gimin chadamberang sorkarini kamna senge ka·dongna nangja, man·adipet an·tangari chu·gimik daitoko ra·e bading-chiwalaniko dake ra·e an·tangtangna mikkangchi janggi tangani cholrangko sandie tangka-paisa kamaiani cholko a·bachengna nanga. Skia man·gipa bang·a chadamberangan indakgipa entrepreneurship-o bakko ra·gija sorkarini kamna ka·donge dongtoka, indiba ma·mong aro a·dok sorkari skia man·gipa chadamberang inditan bang·ani a·sel sakantinade kamrangko on·na amsokja. Uni gimin indake namgipa cholrangko galna nangja, chol man·mitingon an·tangtangna ramako sandina nanga ine ua ku·pattianiko on·aha.
Kamna bimchipgipa manderang maming saloba tangka-paisana dilja, an·tangtangni changa-sapani kri jekoba dake-rike tangka-paisarangko kamai ka·na man·a. Uni gimin Garo Hills gimiko entrepreneurship-o bakko ra·e SBI bank-rang baksa nangdimani cholko tarie tangkarangko ra·srona man·gen ineba tom·bagipa manderangna DC, Pa Ram Singh agan-ku·pattidapangaha.
