Shillong, April 13: A·doko roster system-ko ra·gatengon, skang 1972 bilsioni chanbaesa ra·gatna nanga ine dabienba, A·chik Conscious Holistic Integrated Krima (ACHIK) dol, Bristibar salo a·dokni dakchakgipa skotong minister-na memorandum-ko on·angaha.
Iani bidingo a·dokni dakchakgipa skotong minister Pa Prestone Tynsong-na memorandum-ko on·anggipao, ACHIK dol, Meghalaya a·doko sorkarini kamrangna mande rim·anio A·chik jatni man·gni mipalko Khasi-Jaintia jatrang sekanichi a·doko songpanggipa A·chik jat onchepako man·aha ine nikesa Meghalaya Job Reservation Policy-na roster system-ko ja·rikchina on·ahani gimin iako skang 1972 bilsionin chanbae ra·gatchina gita A·chik jatni palo organisation-ni dabienganiko changsatai gisik ra·atpilna gita nangnika aro iako taridapaniko chinga maming dakeba ra·chakna man·jawa ine janapataha.
Ia niamko ra·gatanio maibakai A·chik jatni man·gniko champenga ong·ode, democratic-ni niam gita re·jomanirangko ong·atan baksana, a·songni niam-bidiko bil on·gimino pangchake jingjengatanirangko ong·atgen, maina chinga ia niamni bidingo manderangna agan-talate on·anirangkoba organisation, A·chik a·song gimikon a·bachengatengaha ine ACHIK dol, a·dok sorkarina pil·satai mikrakataniko on·angaha.
Roster system-ni mamlako re·baenggipa salrango a·dokni cabinet-o tom·e chanchirimanio aro pilak political dolrang damsan tom·e chanchirimanio, A·chik jatko nichanggalani kamrangchi ia niamko ra·gatangna tik ka·aniko dakgenchimode, Apex court-ni do·gako doktikeskagen ineba organisation mikrakatangkuaha.
Bristibar salo a·dokni dakchakgipa skotong minister-na memorandum-ko on·anggipao, ACHIK dol, uamangni a·bachengaoni dabibaenggipa Tura-o Winter capital-ko songani gimin ba Tura-ko a·dokni gnigipa skotong dakani giminba chanchirimaniko dakchina gita Pa Prestone Tynsong-o mol·molanikoba dakangjolaha.
Iani bidingo organisation-ni janapatani gitade, Tura-o winter capital-ko songna ba a·dokni gnigipa skotong songna gita a·dok sorkarini gisik nangbajani a·selan A·chik manderang pilakni gitan tang·dona gita man·jaha aro changalaniranirangko man·na gita nangahachim.
Iakoba poraie nina man·gen: PDF-ni MLA sakgni NPP baksa bakrimnaba gnang
