Shillong, July 4: Meghalaya a•dokni ad hoc skulrango skigiparangni dormaharangko bariatchina aro ad hoc gadangoniko deficit-ni gadangona ra•doatchina dabie skigiparang jingjengatanirangko daktokengon, Sombar salo Meghalaya a•dokni Cabinet tom•e chanchirimangenba, ad hoc skulrango skigiparangni dormaharangko July 1 tarikoni bariatna ra•chakangaha.
Cabinet tom•ani ja•mano kobor ra•timgiparangna talataniko on•angengon, Higher Secondary, Secondary aro Science skigiparangni dormahako gong 9000/-chi bariatna aro UP, LP, Hindi baksana SSA-ni 4th teacher-rangna gong 6000/- ka•e bariatna Cabinet tik ka•aha ine a•dokni Chief Minister Conrad K Sangma parakataha.
Ad hoc skulrango skigiparangni dormahako bariatna sorkari tik ka•ahani gimin da•o higher secondary skulrango skigiparang japrako gong 33,000/-ko, secondary skulrango skigiparang gong 29,000/- aro Science skigiparang gong 31,000/-ko man•skagnok ine Chief Minister parakataha.
UP skulrango skigiparangba da•o gong 22,000/-ko, LP skulrango skigiparang gong 18,000/-ko, Hindi skigiparang gong 18,000/-ko aro SSA-ni 4th teacher-rangba da•o gong 18,000/-o japrako man•gnok ine Chief Minister parakataha.
Chief Minister-ni parakatani gitade, skigiparangni dormahako bariatna sorkari tik ka•ahani gimin sorkari, bilsio gong kror 100-mangko koros ka•dapna nanggnok.
