Tura, Feb 25: Garo Hills Autonomous District Council (GHADC)o kam ka·enggipa Non-Gazetted Employee Association (NGEA)ni sima-gri jingjengatanirangko dakengani gisepon Bristibar salo office ning·ao adita kajia-golmalrang ong·aha.
Kajia ong·ani ja·pangara, mija February 18 tariko jinma re·jome jegalaniko dakangaoni da·alona kingking kamtangtangko ka·gija dontongatengon apsan ka·rimska General Administration Department-ni sakgittam officer-rang manigija office ning·o nape srik-srik kam ka·tokengako ma·sie NGEA-ni dilgiparang aro gipin ka·rimskarang office-ona re·ange uamang sakgittamko beng·e-agane watatpilaha.
Indake ong·engon, jena kingking skotong minister kam ka·enggiparangni dormahako on·na seachi ku·rachakkuja dipet kamtangtangko ka·gija dontonganggen ine NGEA-ni dilgiparang aganahachim.
Iani gisepon, NGEA-ni dilgiparang mija Butbar salo GHADC-ni administrator-ko gronge agangrikanganio chu·sokgipa ong·jaha, maina administrator-ni agangipa kattara kam ka·enggiparangni ra·chakna amgijani ong·achim ine koborna parakataha.
GHADC-o kam ka·enggiparangna jagnini dormaharangko on·na mija bilsi December 22 tarikon ku·chakjokchim, indiba da·alonaba uko man·kugijagiparang bang·en dongengkua. Indake ong·engon, ua dormahako mikkang March jani 5 tariko on·gen aro March 12 tariko jasani dormahako gitcham pay scale-o on·dapgen ine GHADC-ni administration-ni agangipa kattara ra·chakna amgijani ong·chongmota ineba association-ni dilgiparang suk ong·gijaniko parakaha.
Da·al salni bako je obosta ong·ahachim una bateba mikkangchi rakbate ja·ku ga·anggen ine mikrakataniko on·enba, “Chinga gimikan iako jechakaha aro chingna gital pay scale-o dormahako on·kuja dipet, tik ka·gimin gita kamtangtangko ka·jawa aro chinga ia jingjengataniko dakgenchimoba office-ko chipgija chingni man·gnigipa ja 31-ni dormaharangko on·china dabienga, uni gimin pilakan chakchike jinmani tik ka·giminko pe·gija ku·cholsan bakrimaniko on·angkuchina NGEA-ni dilgiparang mol·molangaha.
Chingni man·gnirangkosa chinga dabienga, maming gualaniko daka ong·ja aro chingni pilak neng·nikanirangko gitcham EC-rang aro administrator-rang u·ichakna nanga ine aganenba, da·o iani gisepon officer-rang manigija office-o nape srik-srik kam ka·genchimode uamangni kosako raka ja·kuko de·anggen ine mikrakataniko on·eming GHADC-ni secretary Ma Rikse R. Marak-ko GHADC-oniko gong·raken ra·galchinaba dilgiparang dabiangkuaha.
