New Delhi, August 27: National People’s Party-ni National Committee Meeting-ko da•asalo New Delhi-ni Constitution of India Club-o ong•ataha.
Tom•aniko NPP dolni Chief Conrad K Sangma-ni dilanio dingtang dingtang a•dokrango dolko dilgiparang baksa national committee-ni member-rang bakko ra•angaha.
Chaired the National Committee Meeting in New Delhi joined by party leaders from across the country with the mission to continue working in the spirit of the National People’s Party and ensure victory in the upcoming Assembly Elections in different States pic.twitter.com/1QUfUwedYs
— Conrad Sangma (@SangmaConrad) August 27, 2022
Meghalaya, Tripura aro Nagaland a•dokrango re•baenggipa bilsio election ong•nasienggipana tom•anio chanchirimanirangko dakaha.
NPP dolni gita election-na tarisamsoanirangko dakenga ine NPP-ni Chief Conrad K Sangma kobor ra•ruragiparangna aganaha. Unikoa a•dokni gipin political dol ba BJP baksa bakrimaniko on•e kam ka•ani bidingo sing•anina; NPP dol re•baenggipa assembly election-o darang political dol baksa bakrimjawa, dol ge•san ong•en susaanggen ine Conrad parakataha.
Meghalaya a•doko TMC dolni napani bidingo Conrad K Sangma-ni aganani gitade uamang opposition-ni biapko ra•na man•ahaoba doltangni ning•on ma•ekanirang nadororoaha. TMC Meghalaya a•doko nape so•sojengjeng ong•atenga indiba iandakgipa kamrangchi uamang NPP dolna neng•nikanirangko ra•bana man•jawa ineba janapataha.
Election susaanina NPP dolni kam ka•soanirango dingtang dingtang committee-rangko bikotdape dolna bilakdapaniko ra•baenba kamrangko ka•angna National Committee Meeting-o chanchirimangaha.
