Shillong, Mar 17: Meghalaya a•dokni skanggipa Scientific Mining Coal Block, chong•motan East Jaintia Hills a•jani Byndihati-o donggipa ‘Saryngkham-A’ koela a•damko Sombar salo, Meghalaya a•dokni Chief Minister Conrad K Sangma, video conference gita oprake on•angaha aro ia koela a•damko oprake on•na gita tom•aniko Byndihati-o ong•atanio, a•dokni Cabinet Minister Kyrmen Shylla, Sutnga-Saipung MLA Santa Mary Shylla aro gipinrangba dongpae bak ra•angtokaha.
Ia Scientific Mining Coal Block-ko oprake on•anganio a•dokni Chief Minister, internet gita jinmana aganprakatengon, Meghalaya a•doko scientific mining ba science-ni bewalo koela bikotaniko a•bachengna man•ahani gimin dingtang dingtang official-rangko, koela a•dam nokgiparangko aro mongsongbate ia koela a•kolko bikotna licence man•gipa Byndihati-ni Dapmain Shylla-na an•tangni namgipa skaniko on•angenba, batanggimin bilsi 10-mangna a•doko niam gri koela bikotaniko champengatanichi koela bikotanio pangchake janggi tangenggipa manderang neng•nikanirangko chagrongna nangtokaha ine parakataha.
2018 bilsio uni Chief Minister ong•e MDA sorkariko dilchengani somoio a•doko koela bikotaniko a•bachengpiltaina ua krenge kamrangko ka•na a•bachengaha aro batanggimin bilsidok bilsisnina rakbee kamrangko ka•anichi da•alo skanggipa Scientific Mining Coal Block-ko kulie on•na man•aha ineba Sangma aganaha.
Niamo pangchake koelarangko bikotna dorgasto galenggipa gipin manderangba apsan daken licence-rangko man•china gita sorkari kamrangko ka•enga ineba Chief Minister ku•rachakaniko on•angaha.
Meghalaya a•doko scientific mining-ko a•bachengna gita dingtang dingtang neng•nikanirangko chagrongna nangaha ine janapatengon, Meghalaya a•doko a•arang donganio gipin biaprango gita ong•ja aro namen dingtangani gimin niamrangko tarianio bewalan somoirangko nangaha ine Chief Minister aganaha.
A•doko ia skanggipa Scientific Mining Coal Block-ko kuliahani gimin da•o mikkangchi bang•en koela a•kolrangko kuliroroanggnok ine janapatengon, niamo pangchake koelarangko bikotna gita dorgastorangko galchina sorkari gipinrangkoba didiangkugen ine Chief Minister parakataha.
Ia tom•anio, Sutnga-Saipung-ni MLA Santa Mary Shylla-ba jinmana aganprakengon, Meghalaya a•doko scientific mining ba niamo pangchake koela bikotaniko a•bachengna man•ahani gimin Chief Minister-ko mittelpilangaha.
Na·simang ia video-koba nina man·gen:
Na·simang iakoba poraina man·gen: Turako Winter Capital songchina dabie Williamnagaro ASPF tom·a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
