New Delhi, Aug 22: Afghanistan a·songo Taliban bobil doloni jokna gita katbaenggipa Sikh aro Hindu-rangko nokchakna gitasa India a·songo Citizenship Amendment Act (CAA)-ko ra·gatna nangaha ine Robibar salo, Union Minister Hardeep Singh Puri, ia CAA-ko ma·mong sorkarini ra·gatani bidingo chake aganaha.
Ia CAA-ara Bangladesh, Pakistan aro Afghanistan a·songrango a·rikgalako man·gipa non-Muslim ba Muslim ong·gijagipa manderangko India a·songo nokchakna tarigimin niam ong·achim ine nikna man·a.
“An·chingni songsulo an·ching so·sojengjeng ong·aniko nikna man·enga aro ia so·sojengjeng ong·anio an·chingni Sikh aro Hindu jong-adarang bang·a neng·nikanirangko chagrongna nangtokenga. Iani giminsa Citizenship Amendment Act-ko ra·gatna nangengachim,” ine Puri, social media-o parakataha.
Da·al salni bakon, Afghanistan-ni sak 28 manderangko man·chape gimik sak 168 manderang, Taliban-oni jokna gita katbae India a·songona sokbaahachim.
Afghanistan a·songni Hindu aro Sikh-rang baksana ua a·songo dakchakaniko nangenggipa uamangni ripengrangnaba sorkari dakchakaniko on·na ku·rachakaha.
“An·ching a·songtangni manderangnasan ong·aigija India a·songona re·bana sikenggipa ua a·songni Sikh aro Hindu-rangkoba nokchakna nanggen. India a·songoniko dakchakanirangko man·na ka·dongenggipa an·chingni jong-ada no-abirangna an·ching man·na gita dakchakanirangko on·na nanggen,” ine re·anggipa antio, Security Cabinet Committee-ni tom·anio a·songni Prime Minister Narendra Modi-ba aganahachim.
