Shillong, Aug 20: Amendment Bill ba billko namdapatani gimin aro Parliamentary Standing Committee-ni agan-ku·pattianirangni bidingo Meghalaya a·dokni mongsongggipa ge·gittam Autonomous District Council-rangni Chief Executive Member (CEM)rangko a·dokni skotong minister Pa Conrad K Sangma, Sukrobar salo gronge agangrikangaha.
Ia ge·gittam ADC-rangara – Khasi Hills Autonomous District Council (KHADC), Jaintia Hills Autonomous District Council (JHADC) aro Garo Hills Autonomous District Council (GHADC) ong·a.
Tom·ani ja·man skotong minister Pa Conrad Sangma-ni koborna u·iatani gita, pilak CEM-rangan uamangni agan-ku·pattianirangko on·angtokaha ine agane, re·baenggipa antini gisepon Parliamentary Standing Committee-ba uamangni agan-ku·pattianirangko on·e iako bon·kame tik ka·angna man·gen ineba ua an·tangni ka·dongsoanikoba parakataha.
Iani bidingo KHADC-ni Chief Executive Member (CEM) Pa Titosstar Chyne-ni aganatani gitade, Standing Committee-ni agan-ku·pattianirangko Parliament-na sokatani ja·man chanchie ra·bagimin namdapataniko bilsisa ong·na am·pile ru·utataha.
“Ia ge·gittam ADC-rangni on·anggipa apsan mangsonganirangkon chinga da·oba nipiltaianiko dake agan-chanchirimasan ong·aia,” ine Pa Chyne agan-talataha.
Iani bidingo pilak kamrang ong·enganiko chu·ongnikani dongama ine sing·on, maini a·sel ru·utatenga anga u·ija, indiba anga ma·sia ian a·dok sorkarioni ong·ja indiba ma·mong sorkarionin ru·utatenga ine janaptan baksa, ministry aro a·dok sorkarini gisepo re·anggipa July 5 tariko bon·kame gronggrikaha aro iani gimin bon·kamgipa agananirangko uamang ia ja August 25 tarikon watatani ong·achim, ineba Chyne aganchakangaha.
Da·omiting Covid sajinmani a·sel iako ru·utatna nangao ga·akaha indiba re·baenggipa August 31 ode, uamangni pilak agan-ku·pattianirangko India sorkarini Ministry of Home Affairs-na sokatna man·gen ine uamangni ka·dongenganikoba parakatjolaha.
Unomiting, janapgimin neng·nikanirang jekai a·dokni chong·mot ong·gijagipa tribe-rangoniko candidate-na seokani, janapgimin seat-rangni gimin, dingtang dingtang gadangrango eleksinrangko ong·atani, iarang pilakni bidingo agan-ku·pattianirangko on·ani gimin chinga ning·tue aro che·em-che·em agan-chanchigrikaha ine Pa Sangma u·iataha.
Iani gimin re·baenggipa August 25 attamo a·dok sorkarini pilak agan-ku·pattianirango namedake talgrikna gita bon·kamgipa tom·aniko ong·ate chanchianggen aro ia agan-ku·pattianirangko India sorkarina on·atgen ineba Pa Sangma u·iatkuaha.
Skotong ministerni agandapatani gitade, 10th schedule application ba anti-defection law baksana, an·chingo finance commission-na tangka-paisako chamani gimin agan-ku·pattianikoba man·chape pilak agan-ku·pattigiminrangoni 95 percent-mangko chinga chanchirimangaha.
“Uni gimin ia pilak mongsongbatgipa tik ka·anirangkon chinga man·chapataha aro iana namen kusi ong·a. Indake ong·oba iano jajrengna nanganirang dongkuengani gimin chinga changni-chang manderangoniko uamangni aganpaanikoba ra·enga aro ka·donga, ia chanchianirango chinga apsan ku·cholsan ong·ani ja·man ia namdapatgimin bill-ko mikkangchi a·doko ra·gatna man·gen ine a·dokni skotong minister agandapataha.
