Agartala, Sept 9: Re•anggipa Budbar salo, Tripura a•dokni Agartala songjinmao Pratibadi Kalam songbadko man•chape dambonga media-ni nokrangko chadrapani bidingo police-rangna badi ka•doangani ja•man ia a•selko ta•rakbate am•sandina gita Crime Branch-na pakwate on•angaha.
Budbar salo, BJP aro CPI-M dolni manderang, Gomati a•jani Udaipur, Sepahijala a•jani Bishalgarh, Hapania aro Saliram Tripura-o donggipa Agartala-ni Melarmath jolo dinggrikanichi, kobor ra•timgipa sakbriko man•chape komibeoba sak 10 manderang saknaanirangko man•an baksana CPI-M-ni office te•gniko so•e, Tripura a•dokni damgittam media office-rang, chong•motan Pratibadi Kalam, CPM-ni Daily Desher Katha aro TV Channel PB 24-koba chadrapahachim.
Ia a•sel, West Agartala Police Station mikkangon ong•ahaoba police-rang mamingkoba dakgija nie dongaiaha ine songbadni editor Anal Roy Choudhury, FIR ka•ahani gimin bakan ia case-ko Crime Branch-na pakwate on•ataha.
Media-ni office-rangko chadrapanio jak donggipa manderangko rim•china gita Agartala Press Club-ni secretary Pranab Sarkar aro Ajker Fariad songbadni editor Sanit Debroy-ni dilanichi kobor ra•timgipa manderang, Law & Order-ni IG Arindam Nath-ko uni office-o grongenba didiangtokaha aro ua ia a•selo jak donggipa manderangko rim•na gita ku•rachakaniko on•atskaaha.
