Shillong, March 9: Ri Bhoi a•jani Kyrdemkulai-o Central Agricultural University (CAU)-ko kulina gita Meghalaya sorkari, ma•mong sorkari baksa agangrikengkua ine Budget session-ni gittamgipa salo, a•dokni Chief Minister Conrad K Sangma, Assembly-na parakataha.
Meghalaya a•doko CAU-ko kulina gita a•arangko ra•ani bidingo opposition Congress dol, Assembly-o sing•doangahachim.
Budget session-ni question hour-o aganchakaniko on•angengon, iani bidingo a•dok sorkari, a•songni Prime Minister Narendra Modi-na sedoatjringenga ine Chief Minister parakataha.
“Parliament-ni niamo pangchake Kyrdemkulai-osan ia university-ni institute-ko kuligen,” ine Sangma aganenba, iani bidingon a•dok sorkari, 2015 bilsioba proposal-ko on•atahachim ine parakataha.
Kyrdemkulai-o CAU-ko kulina gita a•arangko ra•manahachim ine talatangengon, iani bidingo a•dok sorkari, ma•mong sorkari baksa agangrikengkua ine Chief Minister parakataha.
“Ia on•gimin a•ako India sorkari, Imphal-ni CAU-o nangchapegipa College of Agriculture (COA)-ko kulina jakkalskaaha,” ineba Sangma parakataha.
Ia a•ana Ri Bhoi a•jani Deputy Commissioner, gimik gong 5,49,66,115 tangkarangko on•manaha ineba Chief Minister parakataha.
Chief Minister-ni aganani gitade, ia a•ana 2010 bilsini December 17 tariko gong 4,39,72,800-ko, 2012 bilsini February 21 tariko gong 64,03,000-ko aro 2012 bilsini September 7 tariko gong 45,90,315 tangkarangko on•manaha.
CAU-na a•dok sorkari, a•ako bhara on•ahama, pakwatmanahama ba sorkarini a•ako palahama ine Congress dolni sakgipin MLA Ampareen Lyngdoh-ni sing•anina aganchakaniko on•angskaengon, Umiam-ni Umktieh-o donggipa Meghalaya Energy Corporation Limited (MeECL)-ni acre 18-na batgipa a•arangko a•dok sorkari on•aha ine Chief Minister parakataha.
Ia a•ako 2005 bilsini February 7 tariko College for Post-Graduate Studies for Agricultural Sciences (CPGS)-ko kulina gita Imphal-ni CAU-na pakwate on•aha ineba Chief Minister parakataha.
Chief Minister-ni talatani gitade, 2008 bilsi dipetan ia kamrang matchotgija dongengkuachim.
“2009 bilsio proposal-ko Planning Commission ra•chake, ia biapko 2010 bilsio Indian Council of Agricultural Research (ICAR)-ni Secretary ra•chakaha. Ia project-ko 2011 aro 2013 bilsio Expenditure of Finance Committee (EFC) talataha aro iana gimik gong kror 300 tangkarangko koros ka•ahachim,” ine Chief Minister aganaha.
“Parliament-ni niamo pangchake chinga CAU-ko kulina gita 2015 bilsio proposal-ko on•ataha,” ineba Sangma parakataha.
2019 bilsini June 25 tariko Parliament (Lok Sabha)-ona ra•anggipa copy-ko Meghalaya sorkarina on•atskae India sorkari aganchakaniko on•ataha ineba Chief Minister parakataha.
