Tura, May 15: A·chik Holistic Awakening Movement (AHAM), Eastern Zone, Williamnagar, a·palchini gipin jat rorirangni skatang A·chik a·songni songrangona napanirangko champengatna kamko ka·ani bidingo mija mija Sonibar salo East Garo Hills-ni skotong Williamnagar-o tom·e chanchiangaha.
Iani bidingo AHAM, Eastern Zone-ni padot Goera-ni koborna seachi u·iatgipao, mande agittal mongsongbate gipin jat rorirangni A·chik songrangona skatang napbaenba, ma·manti bosturangko palbadinganirangko dake A·chik me·chikrangko ra·e-donge nokdang dakanirangko salsa-batbat nikrorona gita man·engani gimin rorirangni napbaaniko chu·gimik champengatsrangna aro A·chik me·chik chadamberangna mikkangchi simsaksoaniko on·na gita miksonge kamko ka·na tik ka·angaha ine janapataha.
A·palchini gipin jatrangni skatang napbaaniko champengna tik ka·angengon, songni Nokma aro Sordar -rangni anti cha·a on·gimin biaprango gipin jat rorirangni jinma baksa jedakgipa bosturangko pal-badinganirangkode maming champengani dongjawa ineba AHAM, koborna janapatkuaha.
Ia ja·kuko de·na gita tik ka·anggiminni bidingo a·jani Deputy Commissioner (DC), Superintendent of Police (SP), Labour office, Nokma aro Sordar-rangnaba u·iatanirangko on·aha ine AHAM janapatenba, ia mamlako nirok-sandiangna gita AHAM, Eastern Zone-ni ning·o donggipa pilak memborrangna bilko on·ataha ineba organisation-ni padot Goera koborna janapatjolaha.
