Tura, Dec 13: Politics-ni a·baona re·baskana nangnike organisation-ni padot gitcham Pa Champion R Sangma-ni political dolo napangani ja·man kamtangko watna tik ka·ani gimin re·anggipa anti Sonibar salo tom·angenba uni biapo George Prince Cheran Momin-ko padotna seokangskaaha ine A·chik Holistic Awakening Movement (AHAM)ni Central Executive Board (CEB), Robibar salo u·iataha.
Seokako man·gipa George Prince Cheran Momin, iana skangde AHAM-ni dakchakgipa padot ong·e dangdike on·engachim.
Iani bidingo koborna seachi janapatani gitade, AHAM – CEB-ni padot Pa Champion R Sangma, padot ong·aoni kamtangko watenba a·joltangni manderangna dangdike on·na miksonge politics-ni a·bao ja·napangaha aro an·tangni palo dilgipani kamko jako ra·rikskachina gita organisation-ni Vice-President, Pa George Prince Cheran Momin-na pakwatangaha ine AHAM u·iataha.
Organisation (AHAM), political baksa maming bak-rengsi dongpajani gimin dolni niamo pangchake kamtangko wate re·angengon, seokgital padotni dilanichi organization-ko gadanggipinona ra·doangchina gita padot gitcham, uni ka·rimskarangko didiangaha.
Unbaksana, organization-ni niamko ja·rike mikkangchi ja·kurangko de·e kamko ka·angchina gita dilgiparangko mol·molangan baksa, organization-ni ge·gittam mongsonggipa krongrang jekai, AHAM-ni padot aro CEB-o, Advisory Board aroba Consultancy Panel-o an·tangni chu·gimik ka·dongchakanikoba Pa Champion R Sangma parakangjolaha.
Apsandake, Chief Organising Secretary, Cherian Momin-ba political dolo ja·napangani gimin ukoba pilak kamoniko neng·takate uni bodol Bromio Marak-ko dolni gital Chief Organizing Secretary-na seokangskaaha ineba AHAM koborna u·iatjolaha.
