Tura, March 13: North Garo Hills, Bajengdoba constituency-ni ning·o donggipa Samkalakgre songni Upper Primary (UP) skul nokni obostarangna aro uno poraienggipa skul bi·sarangna suk ong·chakjae A·chik Holistic Awakening Movement (AHAM), Mendal unit Sonibar salo adita tinrangko ra·ange dakchakaniko on·eaha.
Iani bidingo koborna seachi janapatanio, ua songo donggipa skul nokni nokking namen namsrangjahachim jeni a·selo mikka-wachi karini somoiode skul ka·anirangkon dontongatna nangao ga·akrongachim ine AHAM, Mendal unit-ni dilgiparang Sonibar salo parakataha.
Songni-nokni dilgiparang baksa adita golpogrikaniko dakangon, dingtang dingtang neng·nikanirangko janape agananio, PHC donggipaba namen chel·ani gimin sana-bananirangko dakna neng·nikaniko chagrongenga aro je Sub-Centre dongpagipaoba nangan somoio nurse-rangko man·na neng·a. Unbaksana, re·a-doanioba rama-jal·langrang namkujani a·selo mikka wachiode ua jolni manderang gimikni gitan neng·nikanirangko chagrongna nangtokenga aro PMGSY-ni gita Gokol oni Achotchonggre aro Korepara oni Samkalakgre-ona rama dilgniko tariatenggipaba da·onan matchotkujaenga ine janapatan baksa, ringani chinaba uamang neng·nikaniko man·beenga ine songni-nokni dilgiparang aro uanoni manderang duk ong·bee uamangna agan-janapattokaha ineba AHAM-ni dilgiparang seachi parakataha.
Indake ong·engon, man·adipet mikkangchiba iandakgipa neng·nikanirango AHAM-rang pangnan dakchakaniko on·angronggen ine AHAM, Mendal unit janapatjolaha.
