Guwahati, Nov 10: Gimik-gimang sak 144 songregiparangko gate Kolkata songjinmaoni pring 7:52 bajioni bilchakatbagipa Air India Flight AI754, bangbango bilengmiting somoio sildorengko salgipa pilot, technical-ni gita nosto ong·changaniko u·isamsoe pring 8:13 bajimango Assam, Silchar airport ba sildoreng kapramo tanggitik onchongateaha.
Bilchakataoni adita ja·manon sildorengko chalaigipa pilotni nosto ong·aniko u·ichangani gimino rasong gnangbee uno gae songreenggipa aro ning·o dangdike on·giparang gimikkon naljoke ong·katattokna man·aha.
Wa·alni bilchi re·gipa sildorengo ua somoio technical-ni gita kam ka·gijaniko sildorengo gae songregiparangna agan-talate on·anga baksana flight-ko dontongatanikoba uamangna talate on·angjolaha.
Indake ong·engon, Aircraft-ko tanggitik ong·e Bay no. 3-osa donahani gimino Silchar airport-o ua salni bakode gipinchini bilbagipa flight-rangna biapko man·skajaha jeni giminan sildoreng kapramo biap man·gijaniko u·iatsamsona gita kamko ka·angaha.
Iani gisepon, sildorengo gae songregiparangna nanga gita pilak dakchakanirangko on·china aro flight-ko dontongatani ba gital tikitrangko on·piltaiani giminba Airlines-na agan-ku·pattianiko on·ataha.
