Shillong, March 3: Meghalaya a•doko kamko ka•enggipa All India Service (AIS) officer-rangni gamna nangenggipa income tax-ni 95 percent-ko on•pilna gita Meghalaya sorkarini tik ka•aniko BJP dolni dilgipa aro a•dokni Cabinet Minister AL Hek, ra•pilchina didiangaha.
Bristibar salo Meghalaya Cabinet-ni tom•aniko ong•atengani gimin ia tom•anio All India Service officer-rangna, income tax-ni 95 percent-ko on•pilna tik ka•aniko nipiltaienba, ra•galpilchina gita Hek, a•dok sorkariko didiangaha.
Meghalaya a•doko donge kamko ka•enggipa All India Service officer-rangna uamangni bilsio gamna nangenggipa income tax-oni 95 percent-ko on•pilna gita re•anggipa February 26 tariko a•dokni Cabinet tik ka•angahachim ine nikna man•a.
Indake ong•engon, AIS officer-rangna income tax-oni 95 percent-ko on•pilna sorkarini manchianiko National People’s Party (NPP)-ni state president aro Meghalaya a•dokni Rajya Sabha MP WR Kharlukhi-ba jegalenga ine BJP-ni dilgipa parakataha.
“All India Service officer-rangna income tax-ni 95 percent-ko on•pilna tik ka•aniko nipiltaina nangengani gimin chinga a•dokni Chief Minister Conrad K Sangma-ko gronge mol•molna manchiangaha,” ine Hek parakataha.
Iani bidingo Cabinet-ni tom•e chanchirimani somoio ua an•tangde a•doko dongjachim ineba Hek talatangaha.
“Iani bidingo anga songbadrangonikosa ma•sina man•aha. Secrertariat-o kamko ka•enggipa All India Service officer-rangna iandakgipa cholko on•genchimode ja•mano gipinrangnaba on•na nangao ga•aktelgen, uni gimin iako ra•galpilchina anga sorkariko mol•molenga,” ine BJP Minister parakataha.
Hek-ni aganani gitade, Meghalaya a•doko AIS officer-rangna agreba ICAR, AG aro uandakgipa kamrangko ka•enggipa ma•mongni officer-rangba donga aro sorkari darangkoba mikkang nitee kamko ka•na man•jawachim.
“Ja•manode uamangba iandakgipa cholrangko on•china sorkario dabignok,” ine Hek parakataha.
