New Delhi, Dec 1: Sokbaenggipa Assam Assembly eleksino susana gita, All India United Democratic Front (AIUDF) dol baksa bakrimani gimin All India Congress Committee (AICC) chanchirimtaie bon·kame tik ka·aniko dakanggen ine Congress dolni dilgipa Te Rahul Gandhi mijalo Assam a·dokoni dolni dilgiparangna aganataha
Iani bidingo, mijal Sombar salo Congress dolni chubata gadangni dilgiparang, Assam a·dokni Congress-ni dilgiparang baksa video-link gita agan-golpogrikaniko dakangaha. Te Rahul Gandhi-chi dakdilanggipa tom·anio, AICC-ni general secretary-rang Randeep Singh Surjewala, Mukul Wasnik, Ambika Soni, KC Venugopal, Assam-ni in-charge Jitendra Singh aro adita sak gipin a·gipi dilgiparangba bakko ra·angtokaha.
Uamangna agreba, Assam Congress-ni padot Ripun Bora, warachakgipa dolni dilgipa Debabrata Saikia, Rakibul Hussain, Mahila Congress-ni ma·dot Sushmita Dev, MP-rang Gaurav Gogoi, Pradyut Bordoloi aro Abdul Khaleque, aro AICC-ni secretary-rang Rana Goswami aro Bhupen Bora-maang gimikan mijal salni tom·ao dongpatokaha.
Koborrangko knasoani gitade, Assam-o ong·nasienggipa eleksinna AIUDF baksa bakrimna tik ka·e ra·aniko ma·mongni party-ni dilgiparangna Bora u·iataha.
Bakrimani bidingo man·adipet gong·raken chanchirime tik ka·aniko dakchinaba ua party-ni chubatgipa gadangni dilgiparangko aganaha. Indake ong·engon, Assam-o Assembly election-rang ong·na somairang bang·en dongkuenga ine agane, AICC iana namgipa somaiko ra·e bakrimani gimin chanchirimtaie bon·kame tik ka·aniko dakgen ine Te Gandhi aganataha.
Koborko man·sodapani gita, eleksinrangna nanggipa tangka-paisarangni giminba Bora uamango dakchakaniko am·ataha jenan, BJP-chi rikenggipa a·dokrangna dakaha gita apsandaken AICC jedakeba on·atgen ine ma·mongni dilgiparang aganchakataha.
Party ticket-rangko on·ani somaio a·doko da·o MLA ong·enggiparangna skang chanchie tik ka·aniko dakchinaba ua dingtangmancha mol·molataha. Indake ong·oba, uamangoni mitam MLA-rangko a·dokoni party-ni dilgiparang sason man·jani gimino AICC namen suk ong·jaha ine Venugopal aganataha.
Unomiting, media-ni mikkango je kattarangko agananioba mikrakchina ba simsakchina gita Te Gandhi, Assam Congress-ni dilgiparangko agan-ku·pattiataha. Iako aganengon, Te Gandhi batanggimin somaio Assam Congress-ni dilgiparangni media-na u·iatgipa kattarangchi dolna ong·sianiko ra·baaniko janape, media-ni mikkango uandakgipa kattarangko dolni manderangni agananiko nirokatchina Bora-ko mol·molangaha.
