Guwahati, Sept 12: Al-Qaeda in the Indian sub-continent ba jekon kan·dike AQIS ine minggipa bobil dolming bak donggipa Bangladesh a·songni dolsa bobil dakgipa Ansar al Bangla-ni sakgni manderangko Assam a·doko rim·aha.
Bobil dolni sakgni Musadik Hussain aro Muslim toromni saksa dilgipaba ong·enggipa Ikramul Islam -maangko Nagaon joloniko Morigaon Police rim·aha ine koborna u·iataha.
Police-ni talatani gita, uamang sakgnian kate chakengachim aro chingna aganani gita uamang sakgnian mijao rim·a man·gipa sakgipin toromo dilgipa Mufti Mustafa-chi dilenggipa ABT-ni dolgipin Morigaon module-ni bak ong·a.
Janapna gita iana skang, AQIS baksa bakrimgipa dolgipin bobil dolming nangrime kamko ka·enganiko chanchichipani ja·man Morigaon district-o donggipa ge·sa skie ra·chakram nok Madrassa-ko pe·e galahachim.
Da·odipet, ka·namgijagipa bobil dolrang baksa ning·joljol kamko ka·enganina aro a·doko “jihadi sleeper cells” -ko songna jotton ka·engani gimin jasani gisepon Assam-oni ge·bri Madrassa nokrangko pe·e galangaha.
Iani bidingon re·anggipa ja, Assam-ni skotong minister Pa Himanta Biswa Sarma, Assam a·dok, jihadi-ni pilak ong·gijagipa kamrangko ka·ani biap gita chacha ong·engaha ine parakataha. Unbaksana, a·dokni a·palchini sokbagipa Assam-ni mosque-rang ba madrassa-rangni toromko skiprakgiparang gimikan a·dok sorkarini portal-o bimingko segattokna nanggnok ineba parakatjolaha.
Ia bilsi April jaonin, AQIS baksa bakrimgipa bobil dolrangna kam ka·anio nangchape Assam police gimik sak 40 manderangko rim·aha aro lower aro central Assam-o bang·pagija jatrang gapchipaigipa a·jolrango mongsongbate rakbate simsak-nirikkianirangkoba dakenga.
