Shillong, Feb 26: Meghalaya a•doko kamko ka•enggipa All India Service officer-rangna uamangni income tax-oni 95 percent-ko Meghalaya Cabinet on•pilna gita da•al manchiangaha.
Apsan daken, Meghalaya sorkarini ning•o kamko ka•enggipa manderang, jemangan gipin a•dokrango donge kamrangko ka•engachim, uamangba ia namgniko man•gen.
Iana a•dok sorkari, komibeoba bilsiprako gong kror 1.45 tangkarangko koros ka•na nangao ga•akgen ine talatengon, a•doko kamko ka•enggipa all India service officer-rangna iandakgipa cholko on•ani a•song gimiko Meghalaya a•dokan skanggipa ong•enga ine a•dokni Deputy Chief Minister Prestone Tynsong parakataha.
“Dingtang dingtang biaprangoni re•bae Meghalaya a•doko kamko ka•enggipa officer-rangna, uamangni Income Tax department-na gamna nangenggipa kajinaoni 95 percent-ko a•dok sorkari on•pilgen,” ine Deputy Chief Minister parakataha.
Deputy CM-ni aganani gitade, Income Tax Act-o pangchake Tribal ong•gijagipa officer-rangde India a•song gimikon income tax-ko bilsiprakon gamna nangrongachim.
Apsan daken, a•dok sorkario kam ka•enggipa manderang, jemangan gipin a•dokrango jekai Meghalaya House aro uandakgipa biaprango kamrangko ka•engachim, uamangnaba a•dok sorkari bilsio iandakgipa cholko on•gen.
