Tura, April 5: North East Slow Food aro Agrobiodiversity Society baksana A·chik a·songoni pilak bakrime kamko ka·enggipa songrang nangrimenba, Tura-ni Hotel Polo Orchid-o Aman A·song Millet Festival-ko Butbar salo maniangaha.
Ia manianio, dingtang dingtang sorkari deparment-rangoni College of Community Science, Meghalaya Basin Development Agency, Mission Organic Value Chain Development for Northeast Region (MOVCDNER), ATMA-ni officialrang aro seokgimin manderang, bakrime kamko ka·enggipa songrangoni game-ge·e cha·giparang, project-ni bak ong·gijagipa songrangni Nokmarang, bang·a dingtang dingtang songrangni manderang gimikan bakko ra·angtokaha.
Ia 2023 bilsiko United Nations, International Year of Millet ba mi-misirangni bilsi ine parakatahaoba, misi aro gipin mi-misirangko tangatpiltaiani gimin aro man·anirangko tang·doatani gimin NESFAS dingtangmancha jako ra·e iana skangan kamko ka·baengachim. Uandake, Agroclecology Learning Circle (ALC) project-ni ning·o, jatni dakrongbewal aro u·i-ma·sianirangko jakkale mi-misirangko gama-ge·anio nangchapgipa jekai a·sal, mi-misirangko nisiatgipa jo·ongrang, mi-misirangko nirok-simsakani ba ugitarangni gimin skie ba dake-ka·e nianirangoba song dam 23 rang bakko ra·tokaha.
Tom·aona mongsonggipa ong·e sokgipa Rongram Block-ni Civil Sub-Divisional Officer Pa Abhishek Gowda, unomiting jinmana aganprakanganio, mi-misirangko tangatpilna aro uarangko tang·doatna gita kamrangko ka·enganina pilak game-ge·e cha·giparangko aro NESFAS-ko dingtangmancha de·mittelpilangenba, “Mi-misirango mandena namgniko on·gipa bosurang jekai iron, fibre, calcium-rang gnang aro iandakgipa mi-misirangni gimin chasongsa-chasonggipinoniko man·rikrikbaanirangko aro mi-misini rokommrangko tang·doatna kamrangko ka·na gita nangenga ine aganangaha.
Apsandake, mi-misirangko tang·atpilani gamchatani gimin aro batanggimin bilsirango NESFAS-ni chu·sokgipa kamrangni gimin Garo Hills and Nutrition-ni Senior Associate Tra Rimchi N Marak, tom·ao bak ra·giparangna aganangskaaha.
Programni bon·kamao, bakrime kamko ka·enggipa dingtang dingtang songrangni tarie ra·bagipa cha·ani bosurang, buringni cha·anirang, misini rokomrang, bitchilrang, jaktangchi tarigipa bosturang ba ugitarangko mesoke palchakgipa dokan nokrangkoba oprake on·angaha.
Iakoba poraie nina man·gen: ILP-ko ra·gatani ja·mansa rel garirangko ra·baani bidingo chanchigen: KSU
