Guwahati, May 31: Batanggimin May 27 tariko Charaideo district-ni Borhaat cha bagan samba, Dhudarali jolo Adivasi me·chik saksako kragija til·ek-an·chaanio jak donggipa sakgni manderangko Sombar salo police rim·aha.
Me·chikko til·ekanio dos donggipa sakgni manderangko chinga rim·aha. Covid-na porikka ka·o saa donggijako rim·a man·ani ja·man, Sapekhati Model Hospital-oniko uni demechik baksa uko nokchina watatpilmitingo ong·a obostani gimin mija May 27 tarik attamo koborko man·aha. Nokchina re·pilangmitingo ma·sina man·gijagipa sakgni manderang ua me·chikko rim·gittangangeming til·ekdraahachim,” ine Charaideo-ni Superintendent of Police (SP) Pa Sudhakar Singh koborna agan-talataha.
Pa Singh-ni aganani gita, “Salsagipaon ua me·chik badi ka·eaha aro dos dakgipa sakgni manderangkoba ma·siani gimin uno pangchake chinga sandiataniko a·bachengaha, indake mijal walon uamang sakgniko chinga rim·aha. Niam gita chinga uamangko kacharichi watatgen.”
Obostako chagronggipa me·chikara Borhaat Nagamaati-o donggipa ong·achim aro Borhaat Nagamaati biaponi hospitalona km 25 mang chel·grikachim.
Iani bidingo, medical authority-ni simsakgijanichi ia a·sel-obosta ong·aha ine Assam Tea Tribes Students’ matnange aganangaha.
“Hospital-oniko nokchi watpilatani ja·man, noktangchina name sokangpilna man·na gita ambulance-ko on·atchina medical staff-rango chinga mol·molachim, indiba uamang jechakaiaha. Uni gimin chinga ja·tingtingchi re·angengachim, unomitingosa ia obosta ong·aha,” ine demechik parakataha.
