Shillong, Mar 28: 2013 bilsio South West Garo Hills a•jani Ampati Police Station-o abisa sakgniko drae til•ekgipa gitcham police officer Nurul Islam-na Sombar salo POCSO court, life imprisonment ba janggi tanga gimik pattoko donchina gita raiko on•ataha.
Iani bidingo Sukrobar salo POCSO court-ni hearing-ko dakanio Special Public Prosecutor Evalarisha Rynjah, dos dakgipa police officer-ko janggi tanga gimik pattoko donchina POCSO court-ko mol•molangaha aro uandaken Sombar salo, POCSO court-ni judge FS Sangma, dos dakgipa Nurul Islam-ko janggi tanga gimik pattoko donchina gita raiko on•angaha.
Dos dakgipa gitcham police officer Nurul Islam, POCSO Act 2012 aro IPC-ni ning•o kragija kamrangko ka•ahani gimin sastiko man•na kraa ine re•anggipa Bristibar salo POCSO court, ia police officer-ko dosi chanahachim.
Dos dakgipa Nurul Islam, 2013 bilsini March 13 tariko aro March-ni 14 tarikoba ia abisa sakgnioni bilsi 14 ong•gipa me•chik bi•sako Ampati police station-o drae til•ekahachim. Ia apsan bilsini March 31 tarikoba ua, ia me•chikni bilsi 17 ong•gipa abitangko silchidare mesokenba drae til•ekahachim.
Ia a•sel ong•ani ja•mano abisa sakgnini pagipa, police officer-ni kosako FIR ka•doangahachim.
