Tura, Oct 23: South West Garo Hills-ni skotong Ampati-o donggipa Maternity and Child Hospital (M&CH)ko Mahendraganj-china ra·jitangna am·enganiko A·chik Holistic Awakening Movement (AHAM) jegalataha.
Koborna seachi u·iatgipao, Mahendraganj-ara Ampati-onide namen chel·a aro uko chalaiani aro nirokatanio bang·a neng·nikanirangko chagronggen ine AHAM-ni General Secretary, Wester Sangma janapataha. Unbaksana, Mahendraganj-ara songsul a·song Bangladesh baksa sima-ari chapchapa aro chi-bana ong·ronggipa biapba ong·a ineba ua janapatjolaha.
Indake nikatna man·gen je, Mahendraganj-ara South West Garo Hills District-ni skotong Ampati-oni km 32 mangni gita chel·achim.
Da·o ra·baenggipa Maternity hospital-ko Mahendraganj-china ra·jitangode, a·jani mande jelbra-jelsugipa 80 per cent-mangni gitade dingtang dingtang neng·nikanirangko chagrongtelgen ineba AHAM chanchienga.
South West Garo Hills district-o song dam 470-rang donga jeon mande jelbra-jelsuanira 183560-mang ong·gen, indake a·jao da·odipet ge 9 PHC, ge 2 CHC, aro ge 1 Civil Hospital gnang.
AHAM-ni nikanio, Ampati-an gimikni bijatchigriko ga·aka uni gimin sagiparangni namgnina M&CH-ko Ampati-on ba uni sambajolo donna nanga ine koborna seachi u·iatgipao janapataha.
Indake ong·engon, ia mamlani bidingo niamo badi ka·aniko South West
Garo Hills-ni Deputy Commissioner-ni ui•rikanio a·dokni skotong minister Pa Conrad K. Sangma-na on·ataha.
