Shillong, Feb 6: Meghalaya-o bang·gija salrangni gisepon ong·nasienggipa eleksino Shillong, Pynthorumkhrah constituency-oni BJP dolni candidate ong·e susanasienggipa Pa AL Hek-ni, ia 2023 bilsini eleksino manderang BJP dolko cheatgenchimode an·tangko a·dokni skotong minister ong·gnina a·kange ra·anina South Shillong-ni candidate Pa Sanbor Shullai, Sombar salo doloni ka·rimska MLA-ni kosako matnange aganangaha.
Mikkangchi a·dokni skotong minister ong·gniko ua an·tangna maming dakeba kangsona man·ja, maina BJP-ara ma·mongni party-sa ong·a aro Delhi-oni Party High Command-sa pilakkon tik ka·enga ine Pa Shullai, Sombar salo ma·mongni minister Pa Jitendra Singh-ni dongpaanio East Khasi Hills-ni Deputy Commissioner-ni office-o an·tangni nomination lekko on·angmitingo kobor ra·timgiparangna aganangaha.
Indake ong·engon, BJP high command-onide BJP dolona re·bagital aro Mawsynram-oni susana am·engipa Pa Himalaya Shangpliang-kosa a·kangsoenga ine koborrangni giproroenganiko nikna gita man·skaenga.
Pa Shangpliang, ia jani 27 tariko ong·nasienggipa pu·onanio susana gita Mongolbar salo nomination lekkako on·na tarienga jeon Assam-ni skotong minister Pa Himanta Biswa Sharma, Pa Shangpliang baksa DC office-ona re·angpana gita tarienga ine koboro parakataha.
Unomiting, chang-bongana kingking Pynthorumkhrah constituency-oni MLA ong·enggipa BJP-ni candidate Pa AL Hek, salni bako an·tangni nomination lekkako on·angani ja·man, kobor ra·timgiparangna aganangengon, Meghalaya-na kosakbatao donge chalainagipakoba nangenga, jeon Delhi-o Modi-ni sorkari aro Meghalaya-naba Modi-ni sorkariko nangenga aro skotong minister-na AL Hek-ko nangenga ine aganangahachim.
