Shillong, July 26: Kangal cholgrirangna aro mongsongbate hajira ka•e cha•enggiparangna sorkarini ku•rachakgimin tangka paisarangko chu•gimik on•china dabie, Thma U Rangli-Juki (TUR)-ni dilgipa Angela Rangad-ni Meghalaya Secretariat mikkango jingjengatani antisa gapaha.
Re•anggipa bilsio, hajira ka•e cha•enggiparangna sorkarini ku•rachakgipa gong 2100 tangkarangko ta•raken on•china dabie TUR-ni dilgipa, July 19 tarikonin Secretariat mikkango jingjengatengachim ine nikna man•a.
“Anga ia biapko wate on•kujawa aro iako anga DC-na aro sorkarina u•iatna nangnikenga,” ine Rangad parakataha.
Ia biapko wate on•china gita East Khasi Hills a•jani Deputy Commissioner Isawanda Laloo, Rangad-na seachi u•iatahani gimin ua DC aro sorkarina ia kattarangko aganchakataha.
East Khasi Hills DC-ni parakatani gitade, Angela Rangad-ni badi ka•enggipani bidingo district administration, kosako donggipa official-rangna u•iatmanaha aro iani bidingo Labour department kamrangko ka•engahachim.
Main Secretariat mikkango ba ning•o jinma tom•anirangko ba jegalanirangko dakna niam dongja ineba DC, Rangad-na seatgipa chittio janapataha.
