Shillong, Nov 2: Meghalaya a•dokni skotong Minister Pa Conrad K Sangma, November 2 tariko “Meghalaya Health Policy”-ni bidingo chanchigrikaniko a•bachengataha ine mongsonge jakkalenggipa Social Media-o segataha. See parakatani gita an•seng baljokanina kam ka•ani aro sanchakramrangko rike on•ani a•dokni pilak kona ki•tikoniko niroke a•bachengatgen aro nambatatgen ine talatjolaniko nika.

“Ia tarisamsogiminni ning•o an•seng baljokatanina pilak nangchongmotgipa kamrang aro dakna nanggnirang jeon tanggitik nangani somoirango manderangna sanna bannaniko on•a man•ani indakgiparangkoba man•chapjolgen. Iako a•dokoni aro jinmani an•seng baljokanina kam ka•gipa dolrang, songrango, Block aro District level pilakon gipin an•seng baljokanina kam ka•giparang public ba private-ba ong•china uarang baksa nangrim ma•mong sorkari aro a•dok sorkarini nangrimanio kam ka•na miksongani gnang” ine Hub News-na officialoni ui•ataha.

Ia policy-ni ning•o an•seng baljokanina kam ka•anirangko pilak songdonggiparangnan ma•siatna miksongani gnang. Ianon jinmarang an•seng baljokani a•jao an•tangmangni man•na kragiparangko aro sabisioni chel•chaksona tikka su•ani bidingo ui•atanirangkoba dakjolgen.

“Iano a•doko songdonggipa manderang an•seng baljokanina kam ka•anirangko Health Department aro nangchapao kam ka•giparangoniko ma•sie ra•atna miksonganiba mingsa ong•a” ineba agandapaha.
“Ia policy-ko ra•gatanichi a•doko pilak songdonggiparang aro an•seng baljokanina kam ka•gipani gisepo ui•atanirangko ba ma•sigrike kam ka•anirangko maming donuani gri parake ka•na miksonganiba ong•jolenga” ine official-oni agandapaha.

Ia bilsini a•bachengo sorkari “Meghalaya Health System Strengthening (MHSS)”-ko World Bank Group baksa nanggrime a•bachengatahachim jeni miksonganian tangka gong kror 350-ko jakkale a•doko bilsi bongani gisepo an•seng baljokanina kam ka•ani a•jao ong•batachim. Sorkari a•doko tangka gong kror 70-ko jakkale bang•a PHCs, CHCs aro gipin sanchakram biaprangko namdapatna ine parakatman•aha.