Shillong, Mar 9: Bristibar attamchibara, United Democratic Party (UDP)-ni Cabinet Minister Paul Lyngdoh-na a•dok sorkari, Tourism, Social Welfare, Arts & Culture aro Textile department-rangko on•angani ja•man, an•tangna on•gimin daitorangko ua name chu•sokatna jotton ka•gen ine parakataha.

An•tangna on•gipa portfolio-rangna ua kusi ong•aiama ine sing•anina aganchakaniko on•angengon, “Iano angni kusi ong•ani ba ong•gijani katta dongja maina anga a•dokna dangdike on•na, a•dokko dilna aro a•dokni kamrangko chu•sokate on•nasa re•baaha. Uni gimin je kamrangkon angna tikate on•ahachim, anga ia kamrangko an•tangni man•a gita nambate chu•sokatna jotton ka•gen,” ine Lyngdoh parakataha.