Shillong, Nov 9: Mongolbar salo, Mylliem-ni MLA Hamletson Dohling, Upper Shillong-ni Sanmer-o community hall-ko nokdonggae on•angaha. Ia community hall-ko rikna gita KHADC, ma•mong sorkarini on•gimin scheme-rangoni gong lak 11-ko chame on•aha.
Ia community hall-ko nokdonggae on•angani somoio Mylliem-ni MLA jinmana aganprakengon, gittimantion community hall-rangko nangani gimin ua an•tangni constituency-ni ning•o donggipa gittimantion community hall-rangko rike on•na gita cholrangko sandigen ine ku•rachakangaha.
Mylliem constituency-o namroro silroroani kamrangko ra•bana gita ia constituency-ni ning•o donggipa pilak dilgiparangkon unbaksa bakrime kam ka•china gitaba Hamletson Dohling didiangaha.
Ia community hall-ko nokdonggae on•anganio KHADC-ni CEM Titos Chyne, jolni MDC RV Lyngdoh aro gittimko dilgiparangba dongpae bak ra•angaha.
