Shillong, May 17: Meghalaya a•doko gnigipa changna COVID-19-ni giproroaniko nambate warachakna man•na gita Meghalaya sorkari, antignini gisepon oxygen donggipa palangrangko ge 1000-ona bariatgen ine Sombar salo a•dokni Chief Minister Conrad K Sangma parakataha.
Chief Minister-ni parakatani gitade, batanggimin jasani gisepon a•dok sorkari, rakbee kamrangko ka•enba, oxygen donggipa palangrangko ge 350-oniko da•o ge 750-ona bariatna man•ahachim.
Meghalaya a•doko oxygen cylinder-rangkoba ge 700-oniko ge 1500-ona bariatna man•aha ine talatangengon, “Antignini gisepon chinga oxygen donggipa palangrangko ge 1000-ona bariatna ka•dongenga,” ine Chief Minister parakataha.
A•doko oxygen plant-rangko songani gimin janapatengon, Shillong civil hospital, Ganesh Das Hospital aro RP Chest TB Hospital-rangode ia oxygen plant-rangko adita salrangni gisepon matchotgnok ine Chief Minister parakataha.
“Tura, Jowai aro Nongpoh civil hospital-rangoba oxygen plant-rangko adita salrangni gisepon matchotatna chinga jotton ka•gen. Nongstoin, Williamnagar, Baghmara aro Ampati-rangoba oxygen plant-rangko chinga antignini gisepon matchotatna ka•dongenga,” ine Sangma parakataha.
COVID-19 man•gipa manderangna palangrangko nangdapkugen ine niksamsoengani gimin dingtang dingtang jolrango songdongenggipa manderangni dakchakanichi a•dok sorkari, Shillong songjinmani dingtang dingtang biaprango Corona care centre-rangko kulina tik ka•aha ineba Chief Minister parakataha.
Chief Minister-ni aganani gitade, iandakgipa corona care centre-rangko a•dok sorkari, kam ka•giparang baksana oxygen-rangko on•e dakchakanggen.
COVID hospital-rangko kulidapchina gita opposition MLA-rangni dabianina aganchakaniko on•angengon, a•doko COVID hospital-rangko kulidapna sorkari ja•kurangko de•chakataha aro iana sorkari, Shillong civil hospital baksana Umsawli-o donggipa RP Chest TB Hospital-koba chu•gimik COVID hospital dakgnok ine Chief Minister parakataha.
Indake ong•engon, a•doko COVID-19-ni giproroaniko nipiltaina gita Budbar salo pilak political dolrangni tom•aniko Assembly-ni Speaker ong•atenga ineba Chief Minister parakataha.
