Mumbai, Nov 4: Je mokordoma-kon skango chipahachim uko mijamangmang kulipiltaie bilsi-gnina skang an·tangko so·ote sianggipani mamlao nangchape Assam-oni mande aro niksenggipa Republic TV-ni nokgipa Arnab Goswami-ko Butbar pringo Mumbai Police rim·aha.

Dolsa police, Republic TV chief-ni nokona tanggitik re·angenba uko rim·e ra·baaha. Indake ong·engon, uko maiba dosko dakgipa mande gita chacha knio rim·e, ka·mikkenata gnang sak 10-20 mangni gita policerang nokchina napdraange India-o namen niksenggipa news channel-ni skotonggipako rimongkataniko channel-o kam ka·giparang jegalskaaha.

Arnab Goswami-ko rim·ani koborrangko man·soa tapan, “Congress aro unbaksa bakrimgiparang da·oba democracy-ko ong·siattaijok. Republic TV aro Arnab Goswami-ni kosako a·dokni niamko jakkalstetaniara saksa mandeni jakgitelaniko aro 4-gipa democracy-ni krongko chadrapani ong·a. Iachi batanggimin somaio a·songna tanggitikgipa somai ong·anggiminko gisik ra·atpila gita chacha ong·aha. Press-ni jakgitelaniko iandake chadrapako jegalna krachongmota,” ine Home Minister Pa Amit Shah, Twitter-o segatataha.

Apsandake, Press-ni jakgitelaniko indake chadrapaniko chinga raken jegala, aro Press-ko iandake dakaniara kraa ong·ja. Skango, Press-ni kosako kragija dakani kamrang a·songo ong·anggimin somoirangko ian gisik ra·atpila gita ong·jolaha ine  Information and Broadcasting Minister Pa Prakash Javadekar-ba seataha.

Indake ong·engon, Mumbai police uko doke-sate gariona rimongkatbaaha, depanteko dokaha aro nokni manderangkoba jikpakaha ine Goswami a·kangaha.