Shillong, Sept 28: Shillong-ni Laitumkhrah Assamese Secondary School-o skigipani kamna mande rim·aniko dakataniko, Federation of Khasi Jaintia and Garo People (FKJGP) Central body dondipataha.
Ia mamlani bidingo, batanggimin 2018 bilsio ong·atgipa preliminary interview-ni result-ko parakata dongkuja ine apoti ka·anirangko man·eming, FKJGP-ni manderang skul campus-ona napange skigipani kamna mande rim·ataniko champengataha.
Result-rangko parakgija maini gimin apsan post-na advertisement-rangko on·taitaina nanga ine school authority aro managing committee-ko sing·doangan baksa, Education secretary, Khrawkupar Nongseij-ni dilanichi FKJGP-ni dilgiparang school administration-ko grongangtokaha.
RTI-chi sandiate man·ani gita, sakbri candidate-rang written aro personal interview porikka ge·gnion mikkangchakangaha, jeon Khasi me·chik candidate, chu·gimik 30 oniko 20.5 mark-rangko man·e gipinrangna nambate dakahachim, indiba result-ko parakgijan apsan post-na batanggimin 2018 bilsionin changgitam gape advertisement-ko on·piltaitaiaha ine FKJGP-ni dilgipa a·kangaha.
Iako koborni manderangna agananganio, “porikkarangko chingni champengatani a·selara ia apsan porikkakon 2018 bilsio ong·atahachim aro saksa Khasi me·chik namgipa mark-rangko man·e pass ka·aha uni gimin ia post-na uan krabatgipa candidate ong·a” ine FKJGP-ni dilgipa Khrawkupar parakataha.
“Indake ong·genchimoba, school administrative-oni ua me·chikna uni porikkao chu·sokaniko ba skigipani kamko ka·chakatna on·ani giminba u·iata dongjaha aro ia apsan post-nan uamang porikkako ra·na am·taienga. Iandake Khasi me·chikko onchepe dakani kamko chinga maming dakeba ra·chakna man·jawa” ineba Khrawkupar agandapataha.
Skigipani kamko man·gnigipa Khasi me·chikna on·gija apsan post-na porikkako ra·taitaiatani gimin sing·anirang baksa, school-ni principal P Devi-ko gronge agangrikanganio FKJGP, iarangna chu·gimik talataniko on·china gita principal-ko aganaha. Iana school-ni principal, result-rangko parakkujachina Managing Committee (MC)sa aganaha ine talataniko on·angaha.
“School-ni managing committee-ni giminba chinga sandiataniko dakaha aro ma·gipa-pagipani palo ka·enggipa saksa Khasi me·chik jean MC-o bak dongpaa una agrede membor gimikan Assamese-rarakosa nikna man·aha. “Chinga iako raken jegalangkugen, aro iani gisepon a·doko jat basee dakani kamchi skulko chalaiangkuode, chinga una nanga gita ja·kurangko de·atskana nanggen gita nika” ine organisation-ni dilgipa parakatkuaha.
Director of School Education & Literacy (DSEL)-ni office-oniba maming champengani grian Assistant Teacher-ni kamko ka·na gita man·na krabatgipa Khasi me·chikna joining letter-ko sokatchinaba District School Education Officer (DSEO)-na chittiko seatahachim, ine FKJGP-ni dilgipa u·iataha.
“Aiao inmananiara, office-oniko official chittiko man·soani ja·manoba ia skul DSEO-ko maan ra·ja ba dal·e ra·ja aro apsan post-nan uamang porikkako aro interview-rangko ra·kuaiaha ” ineba Khrawkupar janapataha.
Khrawkupar-ni u·iatkuani gitade, Laitumkhrah Assamese Secondary School-o Assistant Teacher-ni kamko man·na krabatgipa Khasi me·chikna cholko on·ani gimin FKJGP, East Khasi Hills-ni DSEO aro Education minister-koba gronge agangrikangkugen.
