Jaipur, Nov 06: Indian Army-o dangdike on·enggipa sipairangni jikdrangni sea-jotaniko aro ki·tap seanirangko manderangna mesokskana gita miksonge Army Wives Welfare Association (AWWA), re·baenggipa November 12 oni 14 tarikona “Abhivyakti Season 2” -ko Rajasthan, Jaipur songjinmani Jawahar Kala Kendra-o ong·atnasienga.
‘Iana skang, “Abhivyakti” ni skanggipa bakko batanggimin 2021 bilsini December jao New Delhi-o ong·atangskaaha. Sea-jotanio aro ki·tap sena gisik nanggiparangni salgitttamna tom·bimonganio, panel discussion-rang, ki·taprangko oprake on·anirang, golpo agananirang, changgipa aro niksenggipa manderangni dakmesokanirang, sechakatenggipa manderangni ki·taprangko oprake on·anirang, workshop-rang donga baksana, a·song gimikoni bading-chiwalgiparangni pala-sim·anirang aro bang·a gipinrangkoba ia programo nikangjolna gita man·gen.
Sea-jotani bidingo tom·aniko ong·atnasienggipao programko mikkim gnangdapatna gita, Princess Diya Kumari ji, kobor serakgiparang jekai Shiv Aroor aro Rahul Singh, Miss India First Runner Up Rubal Shekhawat, Roadies fame-ni Ranvijay Singha aro dakmesokna changgipa Kumud Mishra-maang gimikan bakko ra·angtoknasienga. Unbaksana, ia programona Jaipur-oni aro a·songni gipin biaprangoni pilak sena-jotna gisiko nanggiparang, ki·tap segiparangko dingtangmancha okamenga.
