Guwahati, May 15: Arunachal Pradesh a·dok gimikoni sak 500 mang ong·na am·pile bang·a chadamberang, so·so-jengjeng golmal ong·anggipa Manipur a·dokna tom·tomaniko ra·bapilna aro saksa-sakgipinko kema ka·grikani gisiko on·china gita mija Robibar salo Assam, Margherita-ni Divine Renewal Retreat Centre-o ku·cholsan bi·rimaniko dakangaha.
Tom·anio, Miao diocese-ni Bishop George Pallipparambil, mombatirangko so·e damsan bi·rimaniko dakdilangenba, pilak chadamberangkon tom·tomani aro kema ka·grikanirangko aganprakgipa ong·china gita didiangaha.
“Manipur a·doko ong·anggipa golmalara Ukraine-o dakgrikenggipaming bang·e dingtangja ine North East India Regional Bishops’ Council-ni Youth Commission-ni Chairman Bishop, aganangskaengon, mikkangchina ka·dongani gri ong·an baksa duko ga·akenggipa nokdangrang baksa ong·pae Manipur a·jol gimiko tom·tomani kattarangko gipatna gita ku·cholsan ong·na nanga ine ua parakataha.
“Jedakgipa bimango kajia-golmal aro so·so-jengjengrang ong·oba, dos gri ramram manderangsa neng·nikanikode man·rongbata ine janapange, duko ga·akgipa pilak nokdangrangna apsan duk chakrimpaaniko on·angan baksa neng·nikaniko man·enggipa manderangna man·a kakket jakrangko snile dakchakchina gitaba pilakkon mol·molangjolaha.
Jinma bi·rimanio dongpagipa Arunachal Pradesh Catholic Association (APCA)-ni padot, Taw Tebin, golmal aro bak ong·atgipa bilrangni kosako an·tangtangko chel·chakchina sakantiko mol·molangskaengon, Manipur a·doko ong·anga gita apsan obostarang Arunachal Pradesh a·doko ong·gniko champengsona gita tom·tomanina bi·achi mangmangde ong·aijawa, indiba iako saksa-sakgipinrangnaba gipatrorogipa ong·skana nanggen ine didianiko on·angaha.
Manipur a·doko mande jelbraa gimik lak 30-mangoni Hindu torom bang·batgipa Meitei jatan 60 percent-de gnang aro bangki 40 percent-ara Kristoo bebera·gipa a·bri jolo songdonggipa Kuki aro Naga jatrang ong·skaa.
Dingtang dingtang jatrangni gisepo a·bachenggipa golmalara, Manipur a·doko songdongkamgipa Meitei, Kuki aro Naga-rangni chalaienggipa Christian institution-rang aro bang·a gilja nokrangko so·chipanichi, Christian-rangni kosako ong·gija dakani bimangona sokangskaaniko nikna gita man·aha.
Manipur-o obosta ong·anichi nisiatako man·ani bidingo Imphal-ni Archdiocese-ni official koborko on·atani gitade, St. Paul’s Parish and Pastoral Training Centre aro Imphal-mangmango donggipa gilja nokrangko nisigalanichi gong kror 9 mangni gitade noksan ong·aha.
