Itanagar, Feb 17: Arunachal Pradesh Public Service Commission (APPSC)-ni question paper leak ong•atani bidingo CBI-ni inquiry dakani chu•ongjaha ine matnangenba Sukrobar salo, APPSC-ni porikkako segipa hajalni hajalni candidate-rang, Arunachal Pradesh a•dokni skotong Itanagar songjinmao konta 12-na bandh-ko ong•atangaha aro konta 12-na bandh-ko ong•atanio sorkari office-rang, private office-rang, skul-college-rang aro dokkanrangkoba chipe donattokaha.
Bandh-ko ong•atanio hajalni hajal chatro chatrirang, an•tangtangni dabianirangko chu•sokatchina chrik a•boke ramarango re•jomananirangko nikna gita man•aha.
Konta 12-na bandh-ko ong•atanio mitam sorkari office-rangkode kulie donahachim indiba kam ka•giparang dongjae, bangbang ong•na nangskaaiaha.
Pringonin maming so•sojengjeng ong•anirang dongjana gita ramarango police-rangkoba donattokaha.
Bandh-ko ong•atanio, police aro sorkari garirangni re•ruraanirangko nikna man•ana agrede gipin gari gorarangni re•ruraanirangko nikna man•jaha.
Assistant engineer-ni kamna porikkako ong•atanio APPSC-ni question paper leak ong•aha ine August-ni 29 tariko, porikkako segipa candidate-rangoni saksa Gyamar Padang, police-rangna badi ka•chengahachim ine nikna man•a.
Iani bidingo Arunchal-ni police-rang, APPSC-ni deputy secretary-cum-deputy controller of examination Taket Jerang, assistant engineer-ni kamna porikkako segipa candidate Thomas Gaduk, Jeju institute-ni skigipa Akhliesh Yadav, head assistant aro Thomas Gaduk-ni pagipa Tanyang Gaduk, GPS Tarak Pangin, junior teacher Tama Saroh aro courier-ko chalaigipa Dilip Saha baksana gipin sakgittam manderangko rim•ahachim.
Indake ong•engon, iani bidingo 2014 bilsioni 2022 bilsiona ong•anggipa APPSC-ni chairman, secretary, membor aro pilak gipin official-rangni kosako inquiry-ko dakchina aro maiba ong•gija dakanirang donggenchimode ia official-rangko ta•raken rim•china chatro chatrirang dabiangtokaha.
