Itanagar, Oct 21: Arunachal Pradesh-ni Upper Siang District-o donggipa Tuting headquarters-oni km 25 mangni gita chel·gipa West Siang District-ni Migging minggipa song sambao chelchakgipa dol Army-rangni jakkalgipa adasu Sukrobar pringo a·sel ong·aha ine ja·pangoniko koborko man·soaha.
Official-ni u·iatani gitade, ia a·sel pring 10:45 bajimango ong·aha aro adasuo gae re·anggipa Army-rang sakbonga gnangchim jeoni sakgnini manggisiko a·damoniko man·aha aro bangki sakgittamkoba sandiatenga.
A·sel ong·ani bidingo Upper Siang-ni SP Jummar Basar-ni u·iatani gitade, a·selo gimagiparangko sandina gita sandiatgipa dolko watataha indiba obosta ong·manchagipara a·bri-a·kongraragipa biap ong·anio sandiatgipa dolrang a·damona sokena gita somoiko nanggen.
