Tura, Aug 12: Sukrobar salo, Meghalaya a•dokni Chief Minister Conrad K Sangma, Safe Motherhood Transit Home-ko Rongram Block-ni ning•o donggipa Asanang-o nokdonggae on•angaha.
Ia transit home-ko Chief Minister-ni Safe Motherhood Scheme (CM-SMS)-ni bak gita a•dok sorkari kulie on•aha.
Ia CM-SMS-ara an•o donggipa me•chikrangni aro ma•giparangni sianiko komiatna ra•gatgipa kamrangna dakchakna gita sorkarini a•bachengatgipa scheme ong•achim.
Asanang-o ia Safe Motherhood Transit Home-ko nokdonggae on•anganio a•dokni Chief Minister, jinmana aganprakangengon, MOTHER program-ko ra•gatanichi a•dok sorkari, an•o donggipa me•chikrangna simsak nirokaniko mongsonggipa bak ong•ataha aro safe motherhood scheme-ara health centre-rango an•pakaniko bariatna aro ma•giparangni sianiko komiatna miksonge ra•gatgipa scheme ong•a ine talataniko on•angaha.
Chief Minister-ni parakatani gitade, ia scheme-ni ning•o mongsonggipa mingbri bakrang donga aro uan kenchakna nanggipa ma•giparangna Transit home-ko kuliani, ma•gipa aro uni nokdangni manderangko salrurana gita gari gorarangko donani, segipa ba nokdangni manderangko ma•gipa baksa dongpaate gong 1000-ona kingking sakprako tangka paisarangko on•ani aro bilsio PHC damprakoni nambatgipa songna award-ko changprak on•anian ong•achim.
A•doko dam 80 PHC-rang transit home-rangko kulimanaha ineba ia tom•anio Chief Minister parakataha.
Batanggimin bilsiko tosusagenchimode bataggimin jadokni gisepo an•o donggipa aro ma•giparangni siani 35%-na baten komiangaha ineba Chief Minister parakataha.
