Shillong, July 18: India a•songni gital President-ko seokna Sombar salo pu•onani, Meghalaya a•dokoba tom•tome matchotangaha aro ia pu•onanio a•dok gimikni sak 56 MLA-rang aro Rajya Sabha MP saksaba bakko ra•angaha.
A•songni gital President-ko seokna pu•onaniko Shillong songjinmani Rilbong-o donggipa Meghalaya Assembly Building-o pring 10:00 bajioni attam 5:00 bajiona ong•atangaha, jeon NPP MLA Thomas A Sangma, pu•onchenggipa aro KHNAM-ni MLA Adelbert Nongrum, bon•kame pu•ongipa ong•skaaha.
Meghalaya a•dokni Chief Minister Conrad K Sangma-ni parakatani gitade, skangonin Tribal-rangko a•songni dingtang dingtang biaprango onchepe ra•engani gimin ia chango Tribal me•chikrangoni saksa, a•songni dal•batgipa kamna susaengon, MDA sorkario bakrimenggipa dolrangba unan chakpaaniko on•enga.
Ia election-o NDA-ni candidate Draupadi Murmu chegipa ong•e a•songni President-na seokako man•genchimode a•songo songdongenggipa Tribal-rangni janggi tanganio dingtanganiko ra•bana man•chongmotgen ineba Conrad Sangma parakataha.
Gital President-ko seokna pu•onanirangko re•baenggipa July 21 tariko changen aro gital President ong•e seokako man•gipa mande, July-ni 25 tariko ku•mikchetangskagen.
