Shillong, Sep 30: Re•anggipa September-ni 25 tariko Shillong-ona re•baani somoio ‘India a•songo songdongenggipa mande sakantian Hindu’ ine RSS-ni dilgipa Mohan Bhagwat-ni agananiko People’s Democratic Front (PDF)-ni chadambe dol raken jegalataha.
Iani bidingo kobor ra•timgipa manderang baksa agangrikengon, India a•songni chonchongipa Tribal jat gimikan an•tangtangni bebera•ani aro daka rikanirang donga aro Bhagwat-ni agangipa kattarangara, ia Tribal jatrangni bebera•aniko pe•ani gita ong•enga ine Sukrobar salo, PDF youth wing-ni dilgipa Egenstar Kurkalang parakataha.
Khasirangde chengonin aro mikkangchiba an•tangtangni dakbewal rikbewalo janggi tanggiparang ong•a aro ia daka rikanirangko darangonikoba ra•srogiparang ong•ja ineba ua parakataha.
Kurkalang-ni parakatani gitade, ma•mong aro a•dok sorkari dolgnian Khasirangni bebera•ani aro daka rikanirangko chel•chakna nanggen inesa 1948 bilsini December jao Khasi a•dokni dilgiparang, India sorkari baksa Instrument of Accession-o soi ka•ahachim.
