Tura, Nov 8: Meghalaya a•dok gimiko ong•atanggipa Aspire Meghalaya District Talents Events 2022-o dingtang dingtang a•jarangoni gimik sak 36 chadamberang seokako man•aha.
Ia Aspire Meghalaya District Talent Events 2022-ko re•anggipa October 6 tarikoni a•bachenge, dingtang dingtang a•jarango ong•atangahachim aro ia susaanirango a•dok gimikoni sak 13,000-na baten bakko ra•angahachim.
Ia program-ko Mongolbar salo West Garo Hills a•jao matchotataha, jeon West Garo Hills a•jani sakgittam chadamberang, seokako man•aha.
Ia program-ara chadamberangni changa sapanirangko sandina gita State Education Mission Authority Meghalaya (SEMAM)-ni dakchakanichi, Meghalaya sorkarini ning•o donggipa Sports & Youth Affairs Directorate-ni a•bachengatgipa program ong•a aro ia program-ko Meghalaya a•dokni AVENUES dol, jako ra•e ong•atangahachim.
Dingtang dingtang a•jarango seokako man•gipa sak 36 chadamberang, re•baenggipa December jao ong•atna sienggipa State Summit-o tom•chimonge an•tangtangni changa sapanirangko mesokanggen aro iano nambatgipa chadamberangko seokangskagen.
