Guwahati, Aug 6: Assam aro Meghalaya a•dokni simarango meligrikgijanirangko namatpilna gita Sukrobar salo a•dok damgnini chief minister-rang, gnigipa changna Guwahati-o tom•e agangrikangahaon, a•dok damgnini gisepo meli-nangrimaniko ra•bapilna gita nanggenchimode a•dok damgnini simarangko gital dake salpiltaichina a•dok damgnian ma•mong sorkariko didiatgen ine tik ka•angaha.
A•dok damgnini gisepo meligrikna man•jaenggipa biaprangko name am•sandina gita regional committee-rangko songe donna tik ka•angahani gimin ia regional committee-rang kamko ka•anio chu•sokjagenchimode a•dok damgnini chief minister sakgnian, ia biaprangko re•e nianggen ineba ia tom•anio a•dok damgnini CM-rang tik ka•e donangaha.
Assam aro Meghalaya a•dokni simarango meligrikna man•jaenggipa gimik dam 12 biaprang dongachim aro ia meligrikna man•jaenggipa biaprangko a•dok damgnian gadang gadang dake namatna tik ka•angenba, skanggipa bako damdok biaprango meligrikgijaniko namatchengna gita a•dok sorkari dolgnian ku•rachakgrikangaha.
