Guwahati, August 23: Assam aro Arunachal Pradesh-ni sima-ari jolrango so•sojengjeng ong•anirangna Regional Committee wene nirokeaniko dakaha.
Sombar salo Assam-ni Information and Public Relations Minister, Pijush Hazarik Balipara biapona wenangaha jeon Regional Committee-ko Arunachal Pradesh Deputy Chief Minister, Chowna Mein-ni dilanio aro Assam Regional Committee-ko Assam Border Protection and Development Minister, Atul Bora-ni dilanio so•sojengjeng ong•enggipa biap Assam- Arunachal Pradesh sima-arini Namsai a•jaona nirokeaha.
‘Namsai Declaration’-ko July 15, 2022 bilsio soi ka•grikani ja•man ian Assam-ni Chief Minister, Himanta Biswa Sarma aro Arunachal Pradesh-ni Chief Minister, Pema Khandu-ni gisepgriko gronge chanchirimani ong•chengaha. Assam aro Arunachal Pradesh a•dokrangni gisepo Assam-ni dam 8 a•jarango aro Arunachal Pradesh-ni dam 12 a•jarango so•sojengjeng ong•anirangko niroke nampilatani kamrangna August 31 tarikona somoi ra•aha aro iako a•dok damgnini Regional Committee-rang wene nirokanichi kamrangko ka•anggen.
Namsai Declaration-ko dakani somoio a•dok damgnini Chief Minister-rangan, Regional Committee-o bak man•paanio so•sojengjeng ong•enggipa biaprangona wene songni manderang baksa chanchirimaniko dakangaha ine Minister Bora u•iataha.
Dolgni committee-rangan Mengkengmiri Simanta, Tengapani, Tinsukia Namsai jolrangona kakket a•selrangko talna wenangaha.
A•dok damgnini Committee-an sima-ari jolo songdongenggiparangni neng•nikanirangko knachakenba, so•sojengjeng ong•anirangko ta•raken nampilatna cholrangko ra•enga ineba Minister Bora agandapaha.
Regional Committee-ko Bora-ni dilanio Assam-ni Chief Minister-na report-rangko ru•utgijan pakwatanggen ineba parakataha. Ru•utbea bilsirangonin so•sojengjeng ong•enggipa damgni a•dokni sima-ari jolrango neng•nikanirangko gisik matsramgipa Chief Minister-ni re•dilanio nanggrikanirangko bon•atna ka•donge u•iataha.
So•sojengjeng ong•enggipa biaprangona September jani 2 aro 3 tarikrango dolgnian apsan wenaniko dakenba report-rangko tarianggen ine Hazarika aganaha. Sima-ari jolrango neng•nikanirangko chu•gimik namatjaskalde sima-ari jolrango gadang namdapatanirangko ra•bana amjawa ineba janapataha.
Sima-ari jolrango songdongenggipa manderangni agantalatanirangko chu•gimik man•gijade report-rangko tarina man•jawa ine so•sojengjeng ong•enggipa biaprangona wenaniko dakna Minister nangnikenga. Namsai Declaration-ko dakani somoion bang•bata biaprangkon so•sojengjeng ong•anirangoniko namatna man•aha ineba Minister janape, re•baenggipa September 2 aro 3 tarikrango Arunachal Minister aro gipin dilgiparang baksa wene nirokaniko dakanggen ine talatdapaha.
Assam-Arunachal Pradesh sima-ari jolrango nanggrikanirangko nama bewalo namatna kam ka•engnio dam 123 songrangoni dam 86 songrangona tang•onataha.
