Shillong, April 27: A·doko joa kal·ani ba Casino-ko niamni gita sorkari ra·gatna am·anina adita jajaatanirang nakatengon iani bidingo skotong Minister Pa Conrad K Sangma, ian gitalgipa ja·ku de·ani ong·jaenga kakketko aganode bilsi 25-na skangan a·doko joa kal·nirang dongaha indiba dingtangmancha niam tariani dongkujaani a·sel sorkari tangka paisa man·rikani dongjaenga aro iako niam gita ra·gate on·anichiba a·doko tangka paisana neng·nikaniko namatna chol ong·batgnok ine Pa Sangma aganaha.

Ian Meghalaya a·doko ong·genchimoba Assam a·dokni sima ariosa joa kal·chakram casino-ko dongen aro iano joltangni manderang bak ra·na man·jawa ine raka niamkoba dongen. Ia Casino-o mongsongbate a·dokni a·paloni re·bagiparangnasa ong·bata aro Guwahati-ni sepangjolo donaniara ia bading chiwalanio bang·bate gipinoni bak ra·ena altuabatgen ine nikesa uano donenga ineba Pa Sangma agandapaha.