By Fiona Marak
Meghalayao songdongenggipa tribal jatrangni cha∙na namnikbegipa rangoni mingsa matchu be∙enba ong∙a. An∙ching A∙chik jatrangde bia kaoba, mande sioba je dakgipa manianirangoba matchu be∙enkode song∙telaia. Da∙o Assam a∙doko ra∙gatna sienggipa Cattle Preservation Bill, 2021, an∙chingni a∙dokna ba an∙chingni cha∙ani ringani bewalrangna baditana kingking neng∙nikanirangko on∙genchim ukode somoi sokahaosa name dakede u∙ina man∙aigenok.
India a∙song gimikon salgro-salaram a∙dokrangna agre ia matchu denaninirangko, palanirangko aro cha∙anirangko champengani skangoni gnang, maina Hindu toromo uamang matchuko Isol ba uamangni ma∙gipa ine ra∙e olakkia. Indake ong∙genchimoba an∙chingni a∙dokrango matchu be∙enrangko cha∙aniko champengatanirang aro neng∙nikanirangko da∙o dipet man∙kuja. Indiba jensalo ma∙mong sorkariko BJP-dolchi chalaina a∙bachenga intal ia niamrangko rakbatroroe tarianiko nikna man∙enga. Apsan daken Assam a∙dokoba BJP-chi dilenggipa sorkari ia matchu cha∙aniko, denanirangko aro palanirangko on∙jana gita dingtangmancha niamrangko rakbate tariengaha.
Meghalaya a∙dokona je nangchongmotgipa bosturangkoba Assam a∙dokko napakgijade ra∙bana man∙ja. Apsandaken an∙chingona den∙na ra∙baenggipa matchurangba Assamonin sokbaenga. Dao ia ragatnasienggipa niamo gitade je matchukoba permit gride ra∙bana ba ra∙angna man∙jawa ingipa gnang, indide ia niamara an∙chingona matchuko palna ba den∙na ra∙baenggipara neng∙nikani ong∙jawa ine chanchiama? An∙ching Garo Hillsonade gipin a∙dokrangoniko ra∙baenggipa matchurangko Assam napgijade re∙banan man∙jawa. Uni gimin angni chanchiani gitade ia niamrang an∙chingni a∙dokna bang∙a neng∙nikanirangko on∙na sienga. Assamni Chief Minister an∙ching a∙dokna aro gipin salgro-salaram a∙doko jerangan matchu be∙enko cha∙achim uamangna Assam gita matchurangko ra∙anganio maming neng∙nikanirang dongjawa ine agangenchimoba, baditana kingking niamramgko ja∙rike dakanggen ukode darangba agansona man∙ja.
An∙ching a∙dokoba chu∙gimik ong∙e BJP sorkariko rikgenchimode iandakgipa an∙chingni ra∙chakna man∙gijagipa niamrangko ra∙gatna nangaoba ga∙akani donga maina state sorakariko dilenggipade pangnan ma∙mong sorakrini ge∙etgimin aro tarigimin niamrangkon ja∙rikna nangaia aro an∙ching pilakan dilgiparangni politicskode u∙ia, uamang an∙tangni man∙gninasa aro bilko man∙nasa rikbataia. Uni gimin an∙ching dilgiparangko seokengon namgipa mandeko jatna a∙songna ka∙sagipa aro a∙dokna namgnirangko dakgipakosa seokna nanga.
