Guwahati, Aug 30: Adita salrangna mikkarang jimbee waangeming Brahmaputra chibimani namen dal·ahanichi a·gilsak gimiko namen mingsinggipa Assam-ni Kaziranga National Park(KNP)ko chi priptokaha.
Bilsirikkit ong·ronga gitan ianpakoba KNP jolgimikchin chirara gapaiaha, indake ong·engon uanoni pilak matburingrangkon chugipa a·brini naljoka biaprangona jitattokaha.
Ia ong·telaigipa obostani bidingo KNP-ni field director, P Sivakumar-ni u·iatani gitade, chi-bana ong·anichi park-ni 70 per cent-mangkode chi priptokaha aro da·odipet mang bri matburingrang sitokaha ine janapatan baksa, rama batsotmitingo manggittam matburingrang siaha aro Sombar pring 6:30 bajimango park boundary No.1 Sildubi Gaon joloniko Swamp deer ba rokomsa matchok mangsani siakoba man·aha ine u·iataha.
“A·bachenge sandiataniko dakao aro post mortem ka·ani ja·man ian sikar ka·giparangni jakchisa siaha ine ma·sina man·aha. Walni somoio matburingrangni park-oni ong·katmitingosa sel·uchi gochoke so·otaha aro iani kosako mamlakoba segataha jekon da·o sandirokatna a·bachengaha ineba field director u·iatkuaha.
P Sivakumar-i janapatkuani gita, “Gimik gimang donggipa ge 223 camp-rangoni ge 125 camp-rangkode chirang priptokaha. Iani gimin maming naljokatani kamrangko a·bachengatkuja, indiba nanga ong·ode chingni forest guard-rangan tarie dongtokenga, unbaksana, sikar ka·srukaniko champengna gita chingni forest team-an chotchanggija niroktokenga.”
Iandake chi-bana ong·ani somoio Kaziranga-ni ning·ao donggipa chubatgipa a·brirango matburingrangna dingtangmancha tarie dongipa biapchina pilak matburingrangan katdoe dongtokenga.
Indake ong·engon, national park gita kasotgipa National Highway 37 ramako songregiparangko nama tiktak speed-o garirangko saltokchina gita park authority aro district administration ge·etaniko on·angaha.
Iani bidingon, Assam-ni skotong minister Dr Himanta Biswa Sarma-ba NH 715 (gitcham NH 37) gita songregiparangko Twitter-o seachi mol·molatengon, an·ching pilakan Kaziranga National Park-chi namen rasong cha·giparang ong·a indiba chirang dal·anichi uno donggipa pilak matburingrangna neng·nikaniko on·miting somoio lower aro upper Assam-ni gisepo songregiparangko NH 715 gita songregija North Bank gita tarigipa NH 15 ramako songreskachina gita mol·molna nangnika ine u·iatangaha.
